ՀՔԾ պետ. Հովիկ Աբրահամյանին մեղադրանք չի առաջադրվել
ԵՐԵՎԱՆ, 9 օգոստոսի. /ԱՌԿԱ/. ՀՀ նախկին վարչապետ Հովիկ Աբրահամյանին մեղադրանք չի առաջադրվել, այսօր կառավարության նիստից հետո հայտարարեց Հատուկ քննչական ծառայության պետ Սասուն Խաչատրյանը։
Նախօրեին ԱԱԾ–ն Հովիկ Աբրահամյանին պատկանող նախկին մեխանիկա-վերանորոգման գործարանում հայտնաբերել է մեծ քանակի ռազմամթերք։ Նրա եղբայրը` Հենրիկ Աբրահամյանը, ձերբակալվել է ապօրինի կերպով հրազեն և ռազմամթերք ձեռք բերելու և պահելու կասկածանքով։
«Նրա եղբայրը հիմա գտնվում է կասկածյալի կարգավիճակում։ Նա կասկածվում է ապօրինի կերպով հրազեն պահելու մեջ։ Կան տեղեկություններ, որ մարտի 1–ին բացի բանակից և ներքին զորքերին ներգրավված են եղել այլ զինված խմբեր, հիմա նախաքննությամբ ստուգվում է այդ վարկածը», – նշեց Խաչատրյանը։
Նա նաև տեղեկացրեց, որ մեղադրանքներ չեն առաջադրվել նաև պաշտպանության նախկին նախարար Սեյրան Օհանյանին։
«Մեղադրանքներ առաջադրելու դեպքում կարվի համապատասխան հայտարարություն», – ասաց Խաչատրյանը։
ԱԱԾ պետ Արթուր Վանեցյանն իր հերթին տեղեկացրեց, որ օպերատիվ տվյալներով, գործարանում գտնված ռազմամթերքը կապված է 2008 թ.–ի մարտի 1–ի իրադարձությունների հետ։
«Այդ զենքն օգտագործվել է այն անձանց կողմից, ովքեր ներգրավված չեն եղել իրավապահ մարմիններում։ Հայտնաբերվել է մոտ 300 պարկուճ, որոնք չենք կարող իդենտիֆիկացնել` որ զենքից են կրակվել», – լրագրողներին ասաց Վանեցյանն այսօր կառավարության նիստից հետո։–0–
