Հայաստանի ԿԳ նախարարն առաջարկում է վերանվանել երկիրը
ԵՐԵՎԱՆ, 17 հունվարի. /ԱՌԿԱ/. Հայաստանի ԿԳ նախարար Արմեն Աշոտյանն առաջարկել է վերանվանել երկիրը Արևելյան Հայաստանի Հանրապետություն։
Նախարարի կարծիքով` երկրի վերանվանման հարցը կարող է լուծվել Սահմանադրության բարեփոխման միջոցով։
«Հանրային քննարկումներն առավել կենտրոնացել են Հայաստանի քաղաքական և կառավարման համակարգերի փոփոխությունների վրա: Բայց, իմ կարծիքով, սահմանադրական բարեփոխումները խիստ դիտարժան և հետաքրքիր հնարավորություն են ընձեռում նաև արտաքին քաղաքական դաշտում», – գրել է Աշոտյանը Facebook–ի իր էջում։
«Մասնավորապես, ես առաջարկում եմ քննարկել մեր պետության վերանվանման հարցը, պատմական արդարության վերականգնման, հայրենատիրության և պահանջատիրության դիտանկյունից: Կարծում եմ, որ առավել ճիշտ կլիներ Հայկական բարձրավանդակի այս հատվածի վրա կառուցվող պետության անունը դնել Արևելյան Հայաստանի Հանրապետություն», – նշել է Աշոտյանը, ով ՀՀԿ–ի փոխնախագահն է։
Նախարարն ընդգծել է, որ նման առաջարկ է հնչեցրել դեռևս 2005 թվականին Ազգային Ժողովում, կրկին Սահմանադրական փոփոխությունների փաթեթի քննարկման ընթացքում` հիշեցնելով, որ Հայոց ցեղասպանության 100-ամյա տարելիցը մոտենում է: –0–
