Հայաստանն առաջին անգամ ներկայացավ «Future Green City» համաշխարհային համաժողովին Ուտրեխտում (ՖՈՏՈ)

ԵՐԵՎԱՆ, 25 սեպտեմբերի․/ԱՌԿԱ/․ Սեպտեմբերի 23-ից 26-ը Նիդերլանդների Ուտրեխտ քաղաքում անցկացվում է «Future Green City» համաշխարհային համաժողովը, որը միավորում է շինարարության, կանաչապատման, ենթակառուցվածքների և ջրային ռեսուրսների ոլորտները։ 

Այս տարի Հայաստանն առաջին անգամ ներկայացավ աշխարհի ամենամեծ «կանաչ» միջոցառմանը: Green Rock ընկերությունը մասնակցեց համաժողովին՝ ցուցադրելով «Քաղաքային այգիները Կովկասում. պատմական անդրադարձ, մեր օրերի խնդիրներն ու վաղվա ակնկալիքները» ֆիլմը։ Վավերագրական և խաղարկային էլեմենտների խառնուրդով ֆիլմը պատմում է տարածաշրջանում այգիների պատմության, խնդիրների և տեսլականի մասին։ 

Համեմատելով հետսովետական երկրների այգիների ներկա իրավիճակը՝ ֆիլմը նպատակ ունի պարզել հասարակության պահանջները կապված քաղաքում կանաչ տարածքների հետ: Այն ուսումնասիրում է, թե ինչպիսի այգիներ են ուզում տեսնել բնակիչները, ինչ հարմարություններ և բիզնես միավորներ կարող են բավարարել հասարակության տարբեր շերտերի կարիքները։ Green Rock-ի ստեղծած այս ֆիլմը կազմված է հարցազրույցներից հասարակական ակտիվ խմբերի հետ։ 

Green Rock-ի ներկայացուցիչների ելույթին ներկա էին ոլորտի առաջատար մասնագետներ՝ ուրբանիստներ, ճարտարապետներ և պետական պաշտոնյաներ Նիդերլանդներին, Մեծ Բրիտանիայից, Ֆիլիպիններից, ԱՄՆ-ից։ 

Ֆիլմի դիտումից հետո մասնակիցներն իրենց հարցերը ուղղեցին խոսնակներին, ինչը նպաստեց Հայաստանում կանաչապատման ներկա իրավիճակի և մարտահրավերների շուրջ քննարկումներին։ Զրույցը շարունակվեց դիտումից հետո, որտեղ մասնագետները կիսվեցին հնարավոր լուծումների վերաբերյալ իրենց տեսակետներով։

Ուտրեխտի քաղաքապետարանի ներկայացուցիչները նույնպես այցելել էին միջոցառմանը և հայտնեցին իրենց պատրաստակամությունը անհրաժեշտության դեպքում աջակցելու և խորհրդատվություն տրամադրելու՝ ավելի արդյունավետ լուծումներ գտնելու համար։ 

«Future Green City» համաժողովին մասնակցում են ավելի քան 3000 մասնագետներ ամբողջ աշխարհից։ Համաժողովը նախաձեռնել է Նիդերլանդների Royal Association Stadswerk-ը և Royal Dutch Association of Landscapers and Gardeners (VHG)-ը՝ համագործակցելով World Urban Parks (WUP)-ի և International Federation of Municipal Engineering (IFME)-ի հետ։ 

Համաժողովին յոթ ծրագրային ուղղություններով անդրադարձ է կատարվում ամենահրատապ սոցիալական հարցերին՝ կլիմայական խնդիրներ, էներգախնայողություն, կենսաբազմազանություն, վերափոխման ռազմավարություն, փոփոխությունների կառավարում, դիզայն, քաղաքաշինություն և առողջապահություն։