ՀՀ վարչապետի «Լավագույն լրագրող՝ գենդերային հիմնահարցերի լուսաբանման գործում» մրցանակի համար մրցույթ է հայտարարվել Հայաստանում

ԵՐԵՎԱՆ, 17 փետրվարի. /ԱՌԿԱ/. «Լավագույն լրագրող՝ գենդերային հիմնահարցերի լուսաբանման գործում» ՀՀ վարչապետի մրցանակաբաշխությունն է հայտարարվել Հայաստանում, հայտնում է Հայաստանի կառավարության մամուլի ծառայությունը։

Մրցույթն ուղղված է Հայաստանում գենդերային հավասարության խթանման գործում լրագրողների գործունեությունն ըստ արժանվույն գնահատելուն։  

Մրցույթին կարող են ներկայացվել 2013 թ. մարտի 1-ից մինչև 2014 թ. մարտի 10-ը հրապարակված նյութերը։ Նյութերը կգնահատվեն «Հեռուստատեսություն և ռադիո» և  
« Տպագիր և էլեկտրոնային լրատվամիջոցներ» անվանակարգերում։

Անվանակարգերում կարող են առաջադրվել Երևան քաղաքի և ՀՀ մարզերի հեռուստառադիոհեռարձակման, ինչպես նաև տպագիր և էլեկտրոնային մամուլի ներկայացուցիչները, ովքեր 2013 թվականի նշված ամիսների ընթացքում
բարձրացրել և վերլուծել են գենդերային բնույթի խորքային խնդիրներ, անդրադարձել են համայնքային մակարդակում գենդերային խնդիրների լուծման լավագույն փորձին, լուսաբանել են կանանց գործարար և հասարակական նախաձեռնողականության և առաջնորդության լավագույն օրինակները, հրապարակել են նյութեր ուղղված գենդերային կարծրատիպերի վերացմանը:

Նախատեսվում են մրցանակներ առաջին, երկրորդ և երրորդ տեղերի համար: Մրցանակակիրները կստանան նաև խրախուսական պարգևներ հասարակական և միջազգային կառույցների կողմից:

Մրցույթին մասնակցելու համար անհրաժեշտ է ներկայացնել հրապարակված նյութը, առցանց հրապարակված նյութի էլեկտրոնային հասցեն, մամուլում տպագրված նյութի օրիգինալը կամ պատճենը, հեռուստառեպորտաժը DVD սկավառակով 1 օրինակ՝ եթեր հեռարձակված հեռուստաընկերության լոգոյով, ինչպես նաև ՀԸ կողմից տրված տեղեկանքով՝ նյութի եթեր հեռարձակման ամսաթվի վերաբերյալ, ռադիոնյութը CD kam DVD սկավառակով, լրագրողի CV, լրագրողի և լրատվամիջոցի կոնտակտային տվյալներ, նյութի համառոտ նկարագրություն:

Լրագրողական նյութերի ներկայացման վերջնաժամկետն է 2014 թ. մարտի 10-ը: Մրցույթի արդյունքները կամփոփվեն ՀՀ վարչապետին կից կանանց հարցերով խորհրդի 2014 թ. ապրիլի 7-ին կայանալիք նիստում:

ՀՀ կառավարությունը 2010 թվականին հաստատեց «Գենդերային քաղաքականության հայեցակարգը», որը ենթադրում է հավասար պայմանների և հնարավորությունների ստեղծում կանանց և տղամարդկանց անհատական ներուժի դրսևորման համար՝ ի նպաստ երկրի սոցիալ-տնտեսական, քաղաքական և մշակութային զարգացմանը: -0-