Վերաքննիչ դատարանը մերժեց Սամվել Բաբայանի խափանման միջոցը փոխելու միջնորդությունը
ԵՐԵՎԱՆ, 21 ապրիլի. /ԱՌԿԱ/. Վերաքննիչ քրեական դատարանն այսօր մերժեց Լեռնային Ղարաբաղի պաշտպանության նախկին նախարար Սամվել Բաբայանի խափանման միջոցը՝ կալանքը փոխելու դիմումը:
«Ազատություն» ռ/կ–ի հաղորդմամբ, Բաբայանն, ով «Իգլայի» գործով մարտի 24-ից կալանավորված է, կշարունակի մնալ անազատության մեջ:
Այսօր նա ներկա չէր որոշման հրապարակմանը, սակայն, երեկ, մասնակցելով նիստին, դատավորին հորդորել էր կայացնել արդարացի որոշում և փոխել խափանման միջոցը:
«Ումից և ինչի համար պետք է փախնեմ», - փաստաբան Ավետիս Քալաշյանի փոխանցմամբ, դատավորին ասել էր Բաբայանը` շեշտելով, որ իր նկատմամբ կալանավորումը անհիմն է, և ինքը ոչ մի կապ չունի իրեն մեղսագրվող արարքների հետ:
Հիշեցնենք, որ Արցախի պաշտպանության բանակի նախկին հրամանատար, Արցախի պաշտպանության նախկին նախարար Սամվել Բաբայանը մարտի 22-ին ձերբակալվել է մաքսանենգ եղանակով Հայաստանի Հանրապետություն «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի շրջանակում։ –0–
