Առողջապահության նախարարը մանրամասնել է, թե ինչպես է տրամադրվելու բուժօգնությունն առողջության ապահովագրության շրջանակում (ՎԻԴԵՈ)
ԵՐԵՎԱՆ, 25 դեկտեմբերի․/ԱՌԿԱ/․ Առողջապահության նախարար Անահիտ Ավանեսյանը պարզաբանել է, թե ինչպես է անձը ստանալու բուժօգնություն առողջության ապահովագրության շրջանակում։
Ըստ նախարարի՝ առաջինը շտապ և անհետաձգելի դեպքերն են։
«Այս պարագայում անձը դիմում է կամ շտապօգնության ծառայություն, կամ լինում են դեպքեր նաև, որ ինքնուրույն հասնում է բժշկական կենտրոն։ Այս դեպքերում բժշկական կենտրոնում նրան կտրիաժավորեն։ Ի՞նչ է սա նշանակում։ Գնահատելով վիճակը և դրանից ելնելով ցուցումները, անձը կամ կհոսպիտալացվի կամ emergency ծառայությունում կստանա համապատասխան հետազոտություններ և ծառայություններ»,- հայտնեց նախարարը։
Նրա խոսքով՝ այս ծառայությունը տրամադրվում է 24 ժամվա ընթացքում, իսկ եթե նրան հոսպիտալացման ցուցում չտրվի, ապա անձը կուղղորդվի առաջնային օղակ։
Հաջորդը, ըստ նախարարի, կանխարգելիչ այցերը կամ սքրինինգներն են։
«Անձը տարեկան իր կանխարգելիչ այցի և սքրինինգների համար պետք է հերթագրվի Արմեդ համակարգում, պլանավորի իր այցը և հերթագրման արդյունքում՝ կախված թե ինչ սքրինինգային հետազոտություն է անցնելու, կամ կուղղորդվի ուղիղ բժշկական կենտրոն (այս դեպքը բնորոշ է մամոգրաֆիկ ծառայություններին) կամ պոլիկլինիկա, ամբուլատորիա»,- ասաց Ավանեսյանը։
Նախարարի խոսքով՝ այս դեպքերը պլանավորվող և նախօրոք հերթագրման ենթակա դեպքերն են։
Հաջորդ խմբում այն մարդիկ են, որոնք ունեն գանգատներ, քրոնիկ հիվանդություն կամ պլանային բուժօգնության կարիք։ Այս դեպքում անձը անպայման պետք է դիմի պոլիկլինիկա կամ ամբուլատորիա իր թերապևտին, ընտանեկան բժշկին կամ մանկաբույժին։
«Այս դեպքում առաջնային օղակում նրան կտրվի համապատասխան խորհրդատվություն, հետազոտությունների ուղեգրում կիրականացվի, անհրաժեշտ բուժօգնություն կտրամադրվի (եթե դա ցուցված է տրամադրել առաջնային օղակում) կամ հիվանդանոցային բուժօգնության համար կուղեգրվի արդեն հաջորդ էտապ»,- ասաց Ավանեսյանը։
Նախարարը հայտնեց, որ ուղեգիրը լինելու է բաց, այսինքն թերապևտի, ընտանեկան բժշկի կողմից դուրս գրված ուղեգրով անձը կարող է մոտենալ իրեն հարմար և ցանկալի բժշկական կենտրոն և այնտեղ ստանալ միջամտությունը, հետազոտությունը կամ վիրահատությունը։
Ըստ Ավանեսյանի՝ այս ճանապարհը ոչ միայն ծախսարդյունավետ առողջապահական համակարգի մասին է, այլ նաև գրագետ ուղի անհրաժեշտ բուժօգնությունը ստանալու։
Ավանեսյանը հայտնեց նաև, որ պլանային դեպքերը առողջության ապահովագրության շրջանակում նույնպես լինելու են հերթագրման ենթակա և հիշեցրեց, որ սա վերաբերում է պլանային դեպքերին, իսկ շտապ և անհետաձգելի դեպքերը կսպասարկվեն անհապաղաղ։
ՀՀ-ում առողջության պարտադիր ապահովագրության համակարգի մասին
2026 թվականին՝ առողջության համընդհանուր ապահովագրության համակարգին անցնելու առաջին փուլում (2026-2028), ապահովագրված կլինի 1.7 միլիոն ՀՀ բնակիչ։ Նրանց թվում են 18 տարեկանից փոքր և 65 տարեկանից բարձր անձինք, ինչպես նաև հաշմանդամություն ունեցող անձինք և սոցիալական նպաստներ ստացողները։ Այս անձանց համար պետությունը կծածկի ծախսերի 100%-ը։ Այս համակարգը կներառի նաև 190,000 աշխատող քաղաքացու, որոնց ամսական եկամուտը գերազանցում է 200,000 դրամը։ Առողջության ապահովագրության փաթեթի արժեքը կկազմի տարեկան 129,600 դրամ, որը կվճարվի ամսական։
Ապահովագրությունը կծածկի ամենապահանջված ծառայությունները, այդ թվում՝ ամբուլատոր բուժօգնությունը, կլինիկա այցելությունները, ընտանեկան բժշկի այցելությունները, մասնագետների խորհրդատվությունները և տարեկան որոշակի քանակությամբ լաբորատոր հետազոտություններ։ Ծառայությունների ցանկը կընդլայնվի և կհստակեցվի՝ ներառելով որոշակի վիրաբուժական միջամտություններ, այդ թվում՝ ակնաբուժական (կատարկտ), սրտանոթային և այլն։
2026 թվականի բյուջեով առողջության ապահովագրության համակարգի ներդրման համար հատկացված է 127 միլիարդ դրամ։
