ՀՀ ԴԱՀԿ ծառայության ղեկավարը հանդիպում է ունեցել Սերբիայի նախագահի նստավայրում

ԵՐԵՎԱՆ, 26 փետրվարի. /ԱՌԿԱ/. ՀՀ ԴԱՀԿ ծառայության պատվիրակության աշխատանքային այցի առաջին օրը կայացավ հանդիպում Սերբիայի Հանրապետության նախագահական նստավայրում, հայտնում է ԴԱՀԿ ծառայությունը:

Ինչպես նշված է հաղորդագրության մեջ, ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանին և պատվիրակության անդամներին ընդունեց Սերբիայի Հանրապետության նախագահի խորհրդական Օլիվեր Անտիչը:

Հանդիպման սկզբում, ողջունելով ՀՀ գլխավոր հարկադիր կատարողին և պատվիրակության անդամներին, պարոն Անտիչն ընդգծեց, որ պատիվ ունի ընդունելու բարեկամական երկրից բարեկամական երկիր ժամանած պատվիրակությանը և կարևորեց երկու երկրների միջև տարբեր մակարդակներով փոխադարձ կապերի ամրապնդման և համագործակցության զարգացման անհրաժեշտությունը:

Նախագահի խորհրդականն անդրադարձ կատարեց նաև հարկադիր կատարման գործառույթի նշանակությանը յուրաքանչյուր երկրում արդարադատության պատշաճ իրականացման գործընթացում:

Հանդիպման ընթացքում ՀՀ գլխավոր հարկադիր կատարողն իր հերթին ներկայացրեց ՀՀ հարկադիր կատարման ծառայության գործառույթները, տեղը և դերը պետական մարմինների համակարգում, ինչպես նաև՝ այլ պետությունների համապատասխան ծառայությունների հետ համագործակցության ներկայիս շրջանակները և զարգացման հեռանկարները:

Միհրան Պողոսյանը հատկապես կարևորեց այն հանգամանքը, որ ՀՀ ԴԱՀԿ ծառայությունը միջոցներ է ձեռնարկում համագործակցության համար իրավական հիմքերի ձևավորման ուղղությամբ և տեղեկացրեց, որ սույն աշխատանքային այցի շրջանակներում նախատեսվում է նաև Սերբիայի հարկադիր կատարողների ազգային պալատի հետ համագործակցության մասին փոխըմբռնման հուշագրի ստորագրում:

Սերբիայի Հանրապետության նախագահի խորհրդականի խնդրանքով Միհրան Պողոսյանը մանրամասն ներկայացրեց Հայոց ցեղասպանության 100-ամյա տարելիցի կապակցությամբ Հայաստանի Հանրապետությունում իրականացվող նախապատրաստական միջոցառումները:

ՀՀ գլխավոր հարկադիր կատարողը տեղեկացրեց, որ իր հերթին ծառայությունը հրավերներ է ուղարկել շուրջ 35 երկրի հարկադիր կատարման համապատասխան ծառայությունների ղեկավարներին՝ սույն թվականի ապրիլի 26-ին այցելելու Հայաստան և ծառայության հետ միասին հարգանքի տուրք մատուցելու ցեղասպանության անմեղ զոհերի հիշատակին:-0-