Երևանում և մարզերում շտապօգնությունների բրիգադների թիվն ավելացել է
ԵՐԵՎԱՆ, 21 օգոստոսի. /ԱՌԿԱ/. Շտապօգնության բրիգադները Երևանում օգոստոսից ավելացել են 15–ով։ Այս մասին նախօրեին հայտնել է Արսեն Թորոսյանը Facebook–ի իր էջում։
Նախարարն այցելել է Շտապ բուժօգնության կայան և ծանոթացել մատուցած ծառայությունների որակին։
Շտապօգնության 14 բրիգադներով ու մեքենաներով էլ կհամալրվեն մարզերը։
Ինչպես հայտնել է նախարարը, այս ամենը հնարավոր դարձավ կառավարության որոշմամբ առողջապահության նախարարությանը տրամադրած հավելյալ միջոցների շնորհիվ։
Բրիգադների ավելացմանն այդ միջոցներից ուղղվել է 500 միլիոն դրամ։
Թորոսյանի խոսքով, այդ ամենը բերելու է արագ կանչերին, թե հասանելիության, թե որակի բարձրացման առումով։
«Շտապօգնության բժշկական ծառայությունը համարվում է և համարվելու է բոլորի համար անվճար` այստեղ որևէ բան փոխելու մտադրություն չկա և չի լինելու»,– ընդգծել է նա։
Նախարարը շրջայց է կատարել կայանով, այնուհետև այցելել զանգերի կենտրոն, որտեղ անձամբ հետևել է, թե ինչպես են մասնագետները պատասխանում քաղաքացիների զանգերին։ -0-
