Երևանում կանխվել է ավանակի և ձիու մսեղիքի վաճառքը
ԵՐԵՎԱՆ, 21 փետրվարի. /ԱՌԿԱ/. Հայաստանի սննդամթերքի անվտանգության պետական ծառայությունը մսի շուկայում իրականացվող պարբերական շրջայցերի շրջանակում երեքշաբթի կանխել է ավանակի և ձիու մսի վաճառքը։
Ինչպես հայտնում է կարգավորչի մամուլի ծառայությունը, 78 կգ ընդհանուր քաշով ձիու և ավանակի մսեղիք է հայտնաբերվել Զավարյան 16 հասցեում գործող անհատ ձեռնարկատեր Մեխակ Գրիգորյանին պատկանող իրացման կետում։
Միսը եղել է առանց ուղեկցող փաստաթղթերի:
Իրացնող տնտեսավարողի գործունեությունը կասեցվել է, մսից կատարվել է նմուշառում և ուղարկվել լաբորատոր փորձաքննության:
Անասնաբուժասանիտարական փորձաքննությամբ պարզվել է, որ մսեղիքը պիտանի չէ սննդում օգտագործելու համար, ինչի հիման վրա այն ոչնչացվել է:
Սննդամթերքի անվտանգության պետական ծառայությունը հորդորում է սպառողներին միս գնելիս անպայման պահանջել անասնաբուժական ուղեկցող փաստաթղթերը և անասնաբուժասանիտարական փորձաքննության եզրակացությունը, իսկ խախտումներ նկատելու դեպքում՝ զանգահարել Ծառայության «Թեժ գծին» 010 206040 հեռախոսահամարով:
Ավանակի և ձիու մսի իրացման փորձեր Երևանում կատարվել են նաև դեկտեմբերին։ -0-
