«Հայաստան» հիմնադրամի կազմակերպած հեռուստամարաթոնի ընթացքում հավաքագրված գումարի գրեթե կեսը նվիրաբերել են ռուսաստանաբնակ բարերարները

ԵՐԵՎԱՆ, 23 նոյեմբերի. /ԱՌԿԱ/. «Հայաստան» հիմնադրամի կողմից կազմակերպված հեռուստամարաթոնի արդյունքում հանգանակությունների ավելի քան 21 մլն դոլարից 12.1 միլիոնը նվիրաբերել են ռուսաստանաբնակ բարերարները, հայտնում են հիմնադրամի մամուլի ծառայությունից։
«Հայաստան» համահայկական հիմնադրամի հերթական՝ 15-րդ հեռուստամարաթոնը, որն այս անգամ կրում էր «Մեր գյուղը» խորագիրը, սկսվել էր հինգշաբթի 20։00-ին և ավարտվել ուրբաթ Երևանի ժամանակով 08։00-ին։

«Այս տարի հավաքված գումարը ուղղվելու է Հայաստանի և Արցախի գյուղական համայնքների զարգացմանը, ինչպես նաև սիրիահայերի խնդիրներին», ասվում է հաղորդագրության մեջ։

Հայաստանում և Ղարաբաղում հեռուստամարաթոնի ընթացքում հավաքագրվել է շուրջ 2.5 մլն դոլար. Ֆրանսիայում` $2,2 մլն, ԱՄՆ–ում $2,1 մլն (գումարը ճշտվում է), Արգենտինայում` $700 հազար, Կանադայում` $625 հազար, Հնդկաստանում` $600 հազար, Մեծ Բրիտանիայում` $170 հազար, Գերմանիայում` $122 հազար, Բրազիլիայում` 100 հազար, Հոլանդիայում` 58.6 հազար, Իտալիայում` 50 հազար, Հունաստանում` 38.2 հազար, Շվեյցարիայում` 31.8 հազար, Իրանում` 15 հազար, Բելգիայում` 10.2 հազար, Քուվեյթում` 5 հազար դոլար։

Հեռուստամարաթոնի արդյունքում հանգանակությունների և դրանց խոստումների ընդհանուր գումարը կազմեց 21 մլն 422 հազ. 477 ԱՄՆ դոլար։

Նմանատիպ միջոցառումն էլ նախատեսվում է դեկտեմբերի 8-ին անցկացնել Լիբանանում։ Հիմնադրամը շարունակում է նվիրաբերություններ ընդունել։

Նախորդ տարվա հեռուստամարաթոնի ընթացքում հանգանակվել էր մոտ 12 մլն դոլար: Միջոցներն ուղղվել էին Լեռնային Ղարաբաղի ջրամատակարարման համակարգերի կառուցման ֆինանսավորմանը և Հայաստանի սահմանամերձ գյուղերի ենթակառուցվածքների վերականգնմանը:

«Հայաստան» համահայկական հիմնադրամն իր 20-ամյա պատմության ընթացքում Հայաստանում և Արցախում ավելի քան 235 մլն դոլարի ծրագրեր է իրականացրել:

«Հայաստան» համահայկական հիմնադրամը ստեղծվել է 1992 թվականին և հիմնական խնդիրն է համազգային նախագծերի իրագործումը, Հայաստանի և ԼՂՀ-ի ենթակառուցվածքների զարգացումը: Հայաստանի նախագահի գլխավորած հիմնադրամի Հոգաբարձուների խորհրդի կազմում են ամբողջ աշխարհի սփյուռքահայության հեղինակավոր ներկայացուցիչներ:-0-