Բանակը եղել ու շարունակում է մնալ պետության մշտական հոգածության ներքո. Կարեն Կարապետյան
ԵՐԵՎԱՆ, 24 ապրիլի. /ԱՌԿԱ/. Հայաստանի վարչապետի պաշտոնակատար Կարեն Կարապետյանը երեքշաբթի ընդունել է պաշտպանության նախարարի պաշտոնակատար Վիգեն Սարգսյանին, հայտնում է կառավարության մամուլի ծառայությունը։
Նախարարի պաշտոնակատարն ընդգծել է, որ հայկական բանակն ունակ է դիմագրավելու հակառակորդի ցանկացած ոտնձգություն և հարկ եղած դեպքում արժանի հակահարված տալու:
Կարեն Կարապետյանը Սարգսյանի հետ հանդիպմանն ասել է նաև, որ բանակը եղել ու շարունակում է մնալ պետության մշտական հոգածության ներքո և գտնվելու է անձամբ իր ուշադրության կենտրոնում:
Վարչապետի պաշտոնակատարի խոսքով, զինված ուժերում սկսված բարեփոխումները պետք է շարունակվեն, և ամեն ինչ պետք է արվի հայկական զինված ուժերի շարունակական արդիականացման և բանակի էլ ավելի հզորացման համար:
Վիգեն Սարգսյանը զեկուցել է, որ զինված ուժերը շարունակում են մեծ պատասխանատվությամբ իրականացնել իրենց վերապահված գործառույթները՝ ապահովելով երկրի պաշտպանունակությունն ու անառիկ պահելով սահմանները: -0-
