Հայկական խանութներում կրկնապիտակով ապրանք է հայտնաբերվել
08.04.2019,
21:18
Սննդամթերքի անվտանգության պետական ծառայությունը հաղորդում է իրացման ցանցերում առկա կրկնապիտակով արտադրանքի մասին։
ԵՐԵՎԱՆ, 8 ապրիլի./ԱՌԿԱ/. Սննդամթերքի անվտանգության պետական ծառայությունը հաղորդում է իրացման ցանցերում առկա կրկնապիտակով արտադրանքի մասին։
Ինչպես նշել են գերատեսչության մամուլի ծառայությունից, վերջին շրջանում մի շարք քաղաքացիներ ահազանգում են, որ իրացման ցանցերում հայտնվել է «Իգիթ» ՍՊԸ-ի կողմից արտադրված կրկնապիտակով կարագ արտադրատեսակ, որի բնօրինակ պիտակի վրա փակցված է սերուցքաբուսային յուղածո մակնշումը:
Նման մեկ օրինակ քաղաքացին ներկայացրել է ՀՀ ԿԵ սննդամթերքի անվտանգության տեսչական մարմին:
«Հաշվի առնելով վերոգրյալը, ՍԱՏՄ մասնագետների կողմից ձեռնարկվել են համապատասխան վերահսկողական գործողություններ, ինչի մասին կտրվի լրացուցիչ տեղեկատվություն», – նշվում է գերատեսչության հաղորդագրության մեջ:–0–
