Հայաստանի պետական ճարտարագիտական համալսարանը վերանվանվել է Հայաստանի ազգային պոլիտեխնիկական համալսարանի

ԵՐԵՎԱՆ, 13 նոյեմբերի. /ԱՌԿԱ/. Հայաստանի կառավարությունը հինգշաբթի նիստում որոշում է ընդունել «Հայաստանի պետական ճարտարագիտական համալսարան» (Պոլիտեխնիկ) պետական ոչ առևտրային կազմակերպությունը «Հայաստանի ազգային պոլիտեխնիկական համալսարան» (ՀԱՊՀ)
հիմնադրամի վերակազմավորելու մասին։

Հայաստանի կրթության և գիտության նախարար Արմեն Աշոտյանը կառավարության նիստում նշեց, որ շարունակական քայլերի իրականացման արդյունքում բարձրանում է բուհերի ակադեմիական ազատությունը և ինստիտուցիոնալ ինքնակառավարումը։

Ըստ նրա, դա ամբողջովին տեղավորվում է համաշխարհային միտումների սահմաններում և թույլ կտա բուհին առևտրայնացնել իր գիտելիքները, իսկ «որոշ ուղղություններում Պոլիտեխնիկը կարող է հետաքրքիր և մրցունակ լինել իր նորարարություններով»։

Հովիկ Աբրահամյանի` բոլոր բուհերը հիմնադրամների վերածելու հնարավորությունը քննարկելու առաջարկին ի պատասխան Աշոտյանը նշեց, որ թեև նման անհրաժեշտություն կա, բայց ոչ բոլոր բուհերն են դրան պատրաստ, և դրանցից շատերը, հաշվի առնելով սեփական ֆինանսական հոսքերը, նախընտրում են մնալ պետական բուհի կարգավիճակում։

Մեկնաբանելով տվյալ որոշումը` նախարարը լրագրողներին հայտնեց, որ հիմնադրամի կարգավիճակը նշանակում է, որ բուհի անձնակազմը շատ անելիք ունի։

«Սա զուտ իրավաբանական վերափոխում չէ, այլ բովանդակային փոփոխություններ` սերտ կապերի հաստատում շուկայի հետ, կրթության բովանդակության վերանայում, և հուսով եմ, որ նրանք կզբաղվեն այդ հարցերով»,– ասաց Աշոտյանը։

Նախարարը միաժամանակ անընդունելի համարեց, որ այդպիսի հեղինակավոր բուհը ԶԼՄ–ներում հիշատակվում է ոչ թե իր գիտագործնական գործունեության, այլ սկանդալների պատճառով։

Վերջին շրջանում ԶԼՄ–ները բուհի մասին աղմկահարույց նորություններ են հրապարակում` ռեկտորին սեռական ոտնձգությունների մեջ մեղադրելու, սոցցանցերում նրա էջը կոտրելու և մի շարք աշխատակիցների աշխատանքից ազատելու մասին։

«Անընդունելի եմ համարում բուհի վարկանիշի հետ խաղը, անկախ այն հանգամանքից, թե որ կողմն է մեղավոր։ Նախարարությունն իր լիազորությունների շրջանակում կուսումնասիրի հարցը և որոշում կկայացնի միայն օրենսդրության և ոչ թե անձանց մակարդակով»,– ասաց Աշոտյանը։

Հայաստանի պետական ճարտարագիտական համալսարանը Երևանի պոլիտեխնիկ ինստիտուտի իրավահաջորդն է, որը հիմնվել է 1933 թվականին։ Բուհը ուսուցում է իրականացնում 65 մասնագիտության գծով։ -0-