Կաթնամթերքի արտադրամասի գործունեությունը կասեցվել է սննդամթերքի արտադրության հետ անհամատեղելի խախտումների կապակցությամբ․ ՍԱՏՄ
06.11.2025,
14:08
«Աշտարակ Միլկ»–ի արտադրամասի գործունեությունը կասեցվել է
ԵՐԵՎԱՆ, 6 նոյեմբերի․/ԱՌԿԱ/․ Սննդամթերքի անվտանգության տեսչական մարմնի ղեկավարի որոշմամբ՝ կասեցվել է «Աշտարակ Միլկ» ՍՊԸ-ին պատկանող կաթնամթերքի արտադրամասի (կաթի մթերում և կաթի պաղեցում) արտադրական գործունեությունը (Գեղարքունիքի մարզ, գ. Շողակաթ), հաղորդում է Սննդամթերքի անվտանգության տեսչական մարմինը։
Տեսչական մարմնի Երևան կենտրոնի տեսուչների արձանագրած խախտումներն անհամատեղելի են սննդամթերքի արտադրության հետ: Մասնավորապես՝
- հատակների պատերի մակերևույթները պատրաստված չեն եղել անջրանցիկ, լվացվող ախտահանվող նյութերից,
- առաստաղի մակերևույթի վրա կան վնասված հատվածներ, ինչը չի բացառում կեղտի կուտակումը, բորբոսի առաջացումը, մասնիկների թափվելու հնարավորությունը, խոնավության խտացումը,
- արտադրական շինությունների դռները հարթ չեն, պատրաստված չեն չներծծող նյութերից,
- կաթի մթերման և պահպանման համար նախատեսված կշեռքի և քարշակ սարքի մակերևույթի վրա առկա են կոռոզիայի հետքեր։
Վերահսկող մարմինը խախտումների վերացման համար սահմանել է ժամկետ:
