Միչիգան նահանգը հաստատել է ցեղասպանության թեման կրթական ծրագրում ներառելու մասին օրինագիծը
Օրինագիծը ստորագրել է Միչիգանի նահանգապետ Ռիք Սնայդերը։
«Միչիգանում սովորողներին ցեղասպանության մասին ուսուցանելը կարևոր է, քանի որ մենք պետք է հիշենք և տեղեկանանք մեր անցյալի այդ սարսափելի իրադարձությունների մասին՝ շարունակելով աշխատանքներ տանել ավելի հանդուրժող հասարակություն ստեղծելու շուրջ»,– ասել է Սնայդերը։
Ըստ փաստաթղթի, 2016-2017 թթ. ուսումնական տարեշրջանից սկսած դպրոցական շրջանի խորհուրդը կամ հանրակրթական դպրոցի տնօրենների խորհուրդը պետք է ապահովեն, դպրոցական շրջանի կամ հանրակրթական դպրոցի 8-ից 12-րդ դասարանների հասարակագիտության ուսումնական ծրագիրը ներառում է ցեղասպանության մասին դասավանդում՝տարիքի և դասարանի համապատասխան:
Ինչպես նշվում է համագումարի հաղորդման մեջ, օրինագիծն օրենքի ուժ է ստացել Հայոց ցեղասպանության կրթության հանձնաժողովի (AGEC), Համագումարի Միչիգան (նահանգի) տնօրեն Ջոն Ջեմյանի և ամբողջ հասարակության առաջնորդության և ջանքերի շնորհիվ։
Ջեմյանը, անդրադառնալով այս նվաճմանը, հիշեցրել է իր գործընկերոջ և Համագումարի տնօրենների խորհրդի նախկին անդամ Էդգար Հակոբյանի իրականացրած և նահանգային, և դաշնային մակարդակով հանուն ցեղասպանության ճանաչման ուղղված անխոնջ քարոզչության մասին:
«Ուրախ եմ, որ վերջապես իրագործեցինք Միչիգանում Ցեղասպանության վերաբերյալ կրթության մասին այս կարևոր օրենքի ընդունումը», - ասել է Ջեմյանը:
Նրա խոսքով, այս հաջողությունը ցույց է տալիս, որ համայնքի բոլոր առաջնորդների համատեղ աշխատելու դեպքում հնարավոր է մեծ արդյունքների հասնել:
«Հայոց ցեղասպանությունը և Հոլոքոստը չեն կարող մոռացվել» - իր հերթին ասել է Միչիգան նահանգի սենատոր Մարթի Նոլենբերգը։
Այսպիսով, Միչիգանը հետևել է ԱՄՆ վեց նահանգներին, որոնք դա արդեն արել են` Իլինոյս, Կալիֆոռնիա, Ռոդ Այլենդ, Մասաչուսեթս, Նյու Յորք, Նյու Ջերսի։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-
