Ուլտրաձայնային սենսորներով խելացի խաչմերուկ է հայտնվել Երևանում
ԵՐԵՎԱՆ, 23 մարտի. /ԱՌԿԱ/. Ճանապարհային ոստիկանությունը շարունակում է առանց խցանումների երթևեկություն ապահովելու ծրագիրը։
Ինչպես հայտնում է Ոստիկանության մամուլի ծառայությունը, հերթական նորամուծություն է ներդրվել երևանյան խաչմերուկներից մեկում։
Արդեն մի քանի օր է՝ գործում են Գասպարյան-Երևանյան փողոցների խաչմերուկի լուսացույցերի սենսորները, և դրական փոփոխությունն արդեն ակնհայտ է։
Ուլտրաձայնային սենսորները պարզապես թույլ չեն տալիս, որ խաչմերուկում լինեն մեքենաների կուտակումներ։ Վայրկյանների ընթացքում սարքը հաշվում է տրանսպորտային միջոցները, և միանգամից լուսացույցի կարմիր լույսը փոխվում է կանաչի:
Հաղորդման մեջ նշվում է, որ սա հանրապետության առաջին խելացի խաչմերուկն է, որտեղ խցանումները բացառված են։
Ուլտրաձայնային սենսորները նորույթ են ոչ միայն Հայաստանում, այլև՝ տարածաշրջանում։ Պետք է նշել, որ դրանք արտադրվում են Հայաստանում։
Ճանապարհային ոստիկանությունը հետազոտություններ է կատարում մայրաքաղաքի մի քանի այլ խաչմերուկներում նույնպես ուտրաձայնային սենսորներ տեղադրելու ուղղությամբ։ -0-
