ԵԱՀԿ գլխավոր քարտուղարը Երևանի «Մուրացան» համալսարանական հիվանդանոցին 10 հազար եվրո է նվիրաբերել

ԵՐԵՎԱՆ, 11 հուլիսի. /ԱՌԿԱ/. ԵԱՀԿ գլխավոր քարտուղար Լամբերտո Զանյերը Երևանի Մ.Հերացու անվան պետական բժշկական համալսարանի հիվանդանոցին 10 հազար եվրո է նվիրաբերել, հաղորդում է «ԱՌԿԱ» գործակալության թղթակիցը։

Զանյերը չորեքշաբթի եռօրյա պաշտոնական այցով ժամանել է Հայաստան հանրապետության արտաքին գործերի նախարար Էդվարդ Նալբանդյանի հրավերով, հայտնում է ԱԳՆ մամուլի ծառայությունը։

ԵԱՀԿ գլխավոր քարտուղարի խոսքով, նվիրատվությունը հավաքվել է Վիեննայի Հոֆբուրգի կայսերական պալատում կայացած ամենամյա բարեգործական պարահանդեսի ընթացքում, որին մասնակցել են ԵԱՀԿ աշխատակիցներ և ԵԱՀԿ-ում տարբեր երկրների ներկայացուցչություններ։

Ամենամյա պարահանդեսի ընթացքում հանգանակվող միջոցներն ուղղվում են բարեգործական նպատակների համար այն երկրներ, որտեղ գործում են ԵԱՀԿ գրասենյակներ։

«Շատ հաճելի է սկսել այցըն այդ միջոցառումից, քանի որ այն ամլբողջությամբ տեղավորվում է ԵԱՀԿ քաղաքականության և նպատակների մեջ»,- ասաց Զանյերը։

Նա նշեց, որ ԵԱՀԿ երևանյան գրասենյակի ղեկավար Անդրեյ Սորոկինը հրավիրեց իր ուշադրությունը «Մուրացան» հիվանդանոցի գործունեությանը և, նրա խոսքով, ֆինանսական այս օժանդակությամբ ԵԱՀԿ-ն ցույց է տալիս հիվանդանոցի և նրա անձնակազմի աշխատանքի վերաբերյալ իր գնահատականը։

ԵՊԲՀ-ի ռեկտորի ժամանակավոր պաշտոնակատար Սամվել Ավետիսյանն իր հերթին նշեց, որ «Մուրացան» հիվանդանոցը մասնագիտանում է ուռուցքային և արյան հիվանդություններով տառապող երեխաների բուժման ուղղությամբ:

Նա հայտնեց նաև, որ մեկ տարի առաջ Երևանի ԵԱՀԿ գրասենյակը 5 հազար եվրո է նվիրաբերել հիվանդանոցին, ինչը թույլ է տվել ավելի արդյունավետ կազմակերպել հիվանդների բուժման և ախտորոշման ընթացքը։

Առողջապահության փոխնախարար Հայկ Դարբինյանի խոսքով, ԵԱՀԿ-ի կողմից հիվանդանոցին ցուցաբերվող շարունակական օժանդակությունը կարևոր է ոչ այնքան հատկացվող միջոցների ծավալի առումով, այլ հասարակության ամենախոցելի շերտի՝ երեխաների աջակցության գաղափարի համատեքստում։ -0-