ԵՄ երևանյան գրասենյակից հայտնում են, որ Հայաստանում ակտիվիստների նկատմամբ դրսևորած բռնության դեպքերը մտահոգություն են առաջացնում

ԵՐԵՎԱՆ, 13 սեպտեմբերի. /ԱՌԿԱ/. Հայաստանի Եվրամիության պատվիրակությունն ուրբաթ հայտարարությամբ է հանդես եկել, որտեղ մտահոգություն է արտահայտել Հայաստանում քաղաքացիական ակտիվիստների նկատմամբ ցուցաբերած բռնությունների դեպքերի կապակցությամբ, հաղորդում է «Նովոստի–Արմենիա» գործակալությունը։

2013թ-ի սեպտեմբերի 5-ին անհայտ հանցագործներ հարձակվել են Երևանի մամուլի ակումբի ծրագրերի համակարգող Հայկակ Արշամյանի և Transparency International  հակակոռուպցիոն կենտրոնի վարչության անդամ Սուրեն Սաղաթելյանի վրա:

«ԵՄ–ի պատվիրակությունն իր խորը մտահոգությունն է հայտնում Հայաստանում քաղաքացիական ակտիվիստների նկատմամբ ցուցաբերած վերջին հարձակումների, ինչպես նաև իրավապաշտպանների նկատմամբ ահաբեկչության դեպքերի կապակցությամբ»,– ասվում է հայտարարության մեջ, հաղորդում է ՌԻԱ Նովոստին։

Հեղինակները կոչ են արել հայկական իշխանություններին անհապաղ և վճռորոշ քայլեր ձեռնարկել այդ գործողություններն իրագործող անձանց պատասխանատվության ենթարկելու համար։ ԵՄ պատվիրակությունը հիշեցրել է, որ ժողովրդավարական սկզբունքների, ֆունդամենտալ իրավունքների և մարդու ազատության հարգանքը Եվրամիության և Հայաստանի երկկողմ օրակարգի կարևորագույն տարրերն են։

ԵԱՀԿ երևանյան գրասենյակը և Հայաստանում ԱՄՆ դեսպանատունն ավելի վաղ նույնպես հանդես էին եկել հայտարարությամբ, որտեղ դատապարտել էին Հայաստանում քաղաքացիական ակտիվիստների, այդ թվում ԱՄՆ քաղաքացու նկատմամբ ցուցաբերած հարձակումները և կոչ էին արել հայկական իշխանություններին անհապաղ միջոցներ ձեռնարկել մեղավորներին պատժելու և քաղաքացիների իրավունքներն ապահովելու համար։ –0–