Երևանի քաղաքապետը շնորհավորական ուղերձ է հղել դպրոցական վերջին զանգի կապակցությամբ

ԵՐԵՎԱՆ, 24 մայիսի. /ԱՌԿԱ/. Երևանի քաղաքապետ Տարոն Մարգարյանը շնորհավորական ուղերձ է հղել դպրոցական վերջին զանգի կապակցությամբ, տեղեկացնում են Երևանի քաղաքապետարանի մամուլի ծառայությունից

Քաղաքապետը շնորհավորել է շրջանավարտներին կյանքի ամենահիշարժան օրերից մեկի՝ դպրոցական վերջին զանգի օրվա կապակցությամբ։ Օր, որի հետ կապված հիշողությունները նրանց ուղեկցելու են ամբողջ կյանքի ընթացքում:

«Դուք այսօր ձեր առաջին քայլն եք կատարում մեծ կյանքի ճանապարհին, և, ինչ ուղղությամբ էլ ընթանա ձեր ուղին, շատ կարևոր է, որ միշտ հիշեք, որ դուք հաղթանակած սերնդի ժառանգորդ եք ու պարտավոր եք ոչ միայն պահպանել, այլև զարգացնել ու հարստացնել բոլոր այն ձեռքբերումները, որոնք ձեզ է փոխանցվել մեծ դժվարությունների, նաև՝ բազում կյանքերի գնով»,– նշված է ուղարձում։

Քաղաքապետը վստահություն է հայտնել, որ շրջանավարտները ոչ միայն պահպանելու են, այլև նոր որակներ են հաղորդելու մեր ազգային այն արժեքներին, որոնք, դարեդար անցնելով, ծնողների և ուսուցիչների շնորհիվ փոխանցվել են նրանց՝ դրանք հարստացած տեսնելու հավատով։

«Հավատացեք, որ մենք՝ ավագներս, ոգևորվում ենք ձեր յուրաքանչյուր հաջողությամբ և համոզված ենք, որ  դուք բավարար ուժ ու կամք ունեք հաղթահարելու ցանկացած դժվարություն և ձեր ներդրումն եք ունենալու մեր երկրի բարօրության ու մեր սիրելի մայրաքաղաքի շենացման ու այն ավելի լավը դարձնելու գործում։
Մեկ անգամ ևս շնորհավորելով ձեզ դպրոցն ավարտելու կապակցությամբ, ուզում եմ միշտ հիշեք, որ գիտելիքների, կյանքի ճշմարիտ դասերի, մեծ ու փոքր հաջողությունների համար բոլորս առաջին հերթին պարտական ենք մեր մանկավարժներին. խորին հարգանքով իմ շնորհակալության խոսքն եմ ուղղում նրանց՝ իրենց հայրենանվեր աշխատանքի համար: Համոզված եմ, որ դուք իրականություն կդարձնեք ձեզ հետ կապված նրանց, և, իհարկե, նաև ձեր ծնողների  բոլոր հույսերն ու երազանքները»,– նշել է քաղաքապետը։

Տարոն Մարգարյանը բարի երթ, երջանկություն և նորանոր բարձունքների նվաճում է մաղթել շրջանավարտներին։-0-