«Հրազդան» մարզադաշտի լուսավորության աշխատանքները մոտ 900 հազ. դոլար կարժենան
03.05.2012,
16:57
«Հրազդան» մարզադաշտի լուսավորության բարելավման և լուսատախտակների փոփոխման աշխատանքները մոտ 880 հազ. դոլար կարժենան, «ԱՌԿԱ» գործակալությանը հայտնեցին Հայաստանի Ֆուտբոլի ֆեդերացիայի մամուլի ծառայությունից:
ԵՐԵՎԱՆ, 3 մայիսի. /ԱՌԿԱ/. «Հրազդան» մարզադաշտի լուսավորության բարելավման և լուսատախտակների փոփոխման աշխատանքները մոտ 880 հազ. դոլար կարժենան, «ԱՌԿԱ» գործակալությանը հայտնեցին Հայաստանի Ֆուտբոլի ֆեդերացիայի մամուլի ծառայությունից:
Լուսավորության բարելավման աշխատանքների ընդհանուր գումարը կկազմի մոտ 550 հազար ԱՄՆ դոլար: Լուսատախտակի փոխարինման աշխատանքների գումարը կկազմի 330 հազար ԱՄՆ դոլար:
Լուսավորության և լուսատախտակների աշխատանքներն իրականացնելու համար ապրիլի 10-ին Հայաստանի Ֆուտբոլի Ֆեդերացիան հայտարարել էր տենդեր-մրցույթ, որի արդյունքում լուսավորության բարելավման աշխատանքների նպատակով մրցույթին մասնակցություն ցուցաբերած ընկերություններից հաղթող է ճանաչվել Ջեներալ Էլեկտրիկ ընկերությունը, իսկ լուսատախտակների փոփոխման աշխատանքների նպատակով անցկացված տենդեր-մրցույթին՝ Շենզեն Թոփլեդ Օփտոտեխ (Shenzen Topled Optotech Co. Ltd) ընկերությունը:
««Հրազդան» մարզադաշտում իրականացվում են վերանորոգման լայնածավալ աշխատանքներ: ՀՖՖ նախագահ Ռուբեն Հայրապետյանը բազմիցս հայտարարել է, որ «Հրազդանը» նախապատրաստվելու է 2014 թվականի Աշխարհի առաջնության ընտրական փուլի Հայաստան-Իտալիա հանդիպմանը: Հանդերձարանների, հանրային տարածքների եւ այլ ենթակառուցվածքների նորոգման ու ՖԻՖԱ-ի և ՈՒԵՖԱ-ի չափորոշիչներին համապատասխանեցման աշխատանքերին զուգահեռ օրերս կսկսվեն նաև մարզադաշտի լուսավորության և լուսատախտակների հետ կապված աշխատանքերը»,- ասվում է հաղորդագրության մեջ:
Ավելի վաղ ՀՖՖ նախագահ Ռուբեն Հայրապետյանը հայտարարել էր, որ «Հրազդան» մարզադաշտի ամբողջական վերանորոգումը կարժենա 10-15 մլն. դոլար:
Երևանի «Հրազդան» մարզադաշտը Հայաստանի ամենամեծ մարզադաշտն է և կարող է տեղավորել ավելի քան 55 հազ. մարդու: Վերջին տարիներին մարզադաշտում պաշտոնական միջազգային հանդիպումներ չեն անցկացվում, քանի որ այդ բացառիկ շինության որոշ կարևոր կոնստրուկցիաներ թուլացել են: Մարզադաշտին հարող տարածքը վերածվել է տոնավաճառի:
Հայաստանն ընդգրկվել է ընտրական շարքի B խմբում, որտեղ կխաղա Իտալիայի, Դանիայի, Չեխիայի, Բուլղարիայի և Մալթայի հավաքականների հետ: Հայաստանի և Իտալիայի հավաքականների հանդիպումը կկայանա 2012 թվականի հոկտեմբերի 12-ին: -0-
