Հայաստանում կրիպտոակտիվների ոլորտի կարգավորման գրոծում չպետք է լինեն տարբերություններ ֆինանսական շուկայի մասնակիցների միջև․ ՀԲՄ նախագահ
ԵՐԵՎԱՆ, 20 փետրվարի․/ԱՌԿԱ/․ Կարգավորումը, որը ԿԲ–ն կարող է կիրառել կրիպտոարժութային ակտիվների ոլորտում, պետք է լինի նույնական և առնվազն համեմատելի այն չափանիշներին, որոնք կիրառվում են ֆինանսական ոլորտի մյուս սուբյեկտների նկատմամբ։ Այս մասին հայտարարեց Հայաստանի բանկերի միության (ՀԲՄ) նախագահ Դանիել Ազատյանը՝ պատասխանելով «ԱՌԿԱ» գործակալության հարցին։
Նա պարզաբանեց, որ դա վերաբերում է նաև դերակատարների մուտքին շուկա, նրանց համար պետք է սահմանվեն առնվազն այնպիսի չափորոշիչներ, ինչպես բանկերի, ներդրումային ընկերությունների կամ վարկային կազմակերպությունների համար։ Նման չափորոշիչների թվում են դատվածության բացակայությունը, էթիկային նորմերի պահպանումը, նմանատիպ սկզբունքներ պետք է գործեն նորմատիվների, աշխատանքի թափանցիկության հարցում։
Այս կապակցությամբ ՀԲՄ նախագահն ընդգծեց, որ «կարգավորում» և «վերահսկողություն» հասկացությունները պետք չէ առանձնացնել, քանի որ մեկն առանց մյուսի չի կարող գոյություն ունենալ։
Ազատյանը նշեց, որ աշխարհում կրիպտոակտիվների ակտիվ զարգացման ֆոնին կարգավորիչներն ունեն տարբեր դիրքորոշումներ այս հարցի շուրջ։
«Դրական կողմն այն է, որ որևէ վերահսկող մարմին կամ կարգավորող կառույց չի կարող խոչընդոտել տեխնոլոգիական զարգացմանը։ Իսկ բացասականն այն է, որ դեռ կա աշխատանքի մեծ ծավալ հաճախորդների պատշաճ նույնականացման, հնարավոր ռիսկերի կանխման հարցում։ Ընդ որում այդ աշխատանքները տարբերվում են ավանդական բանկային համակարգին վերաբերող հարցերից», – ասաց նա երեքշաբթի ասուլիսի ժամանակ։
ՀՀ կենտրոնական բանկը նախաձեռնել է վիրտուալ ակտիվների համապարփակ կարգավորման և վերահսկման արդյունավետ մոդել մշակելու և ներդնելու միջոցառումներ, որը 2024 թվականին կանցնի կառավարության և խորհրդարանի հետ քննարկման փուլերը՝ հաստատման նպատակով։ Ինչպես ավելի վաղ հայտնել էր կարգավորող մարմնի ղեկավար Մարտին Գալստյանը, այս նախաձեռնությունը հիմնված է այս ոլորտում համաշխարհային լավագույն փորձի վրա, որը ներկայումս ունեն եվրոպական երկրները։ Կարգավորումը հնարավորություն կտա համարժեք արձագանքել վիրտուալ ակտիվների ոլորտում առկա և հնարավոր ռիսկերին՝ միաժամանակ ստեղծելով հստակ իրավական դաշտ այս ոլորտում նորարարությունների և տեխնոլոգիաների զարգացման համար:-0-
