Կոնվերս Բանկի փորձը ներկայացվել է Հայաստանում Արգենտինայի առևտրային պալատի բացման արարողության ժամանակ

ԵՐԵՎԱՆ, 30 սեպտեմբերի./ԱՌԿԱ/. Երեկ կայացել է Հայաստանում Արգենտինայի առևտրային պալատի պաշտոնական բացման արարողությունը, որին մասնակցել և Կոնվերս բանկի փորձն է ներկայացրել Բանկի Գլխավոր գործադիր տնօրեն Արթուր Հակոբյանը: ՀՀ-ում Արգենտինայի դեսպանատան նախաձեռնությամբ կազմակերպված միջոցառմանը ներկա էին  հյուրեր Արգենտինայից, Կոնվերս բանկի ղեկավարությունը, ՀՀ գործարար համայնքի եւ պետական կառույցների ներկայացուցիչներ, հաղորդում է Կոնվերս Բանկի մամուլի ծառայությունը:

«Կոնվերս Բանկը արգենտինական կապիտալով առաջին ընկերություններից է Հայաստանում, որի հիմնական բաժնետերը պարոն Էդուարդո Էռնեկյանն է: Ներկայում Հայաստանում Էռնեկյան ընտանիքի կողմից են կառավարվում նաև Տիեռաս դե Արմենիան, Կարաս վայնսը, Արմենիա միջազգային օդանավակայանները: Դրանց հիմնադրումը ոչ միայն խթան է հանդիսացել տնտեսության տարբեր ճյուղերի զարգացման համար, այլև ստեղծվել են հազարավոր նոր, կայուն աշխատատեղեր»,- իր խոսքում նշել է Կոնվերս Բանկի Գլխավոր գործադիր տնօրեն Արթուր Հակոբյանը:

Նա Կոնվերս Բանկի անունից պատրաստակամություն է հայտնել համապարփակ աջակցություն ցուցաբերել Պալատի աշխատանքներին, նշելով, որ «Հայաստանում Արգենտինայի առեւտրային պալատը ստանձնում է բավականին հետաքրքիր հանձնառություն՝ կապ ստեղծել միմյանցից հազարավոր կիլոմետրեր հեռավորությամբ գտնվող երկրների ու գործարարների միջև:

Հայաստանի տնտեսության զարգացման ներկա փուլում տարբեր երկրների հետ տնտեսական կապերի զարգացումը, ներդրումների խթանումը կարևորագույն հրամայական է և նորաստեղծ պալատը իր ուրույն դերը կարող է ունենալ երկկողմ տնտեսական նախաձեռնությունների իրագործման հարցում: Մենք առավել քան վստահ ենք, որ հայ-արգենտինական տնտեսական կապերը զարգացման մեծ հեռանկար ունեն՝ ինչպես արդյունաբերության, այնպես էլ առևտրի, ՏՏ, զբոսաշրջության, գյուղատնտեսության, մարդկային կապիտալի կառավարման ոլորտներում»:

Հայաստանում Արգենտինայի արտակարգ և լիազոր դեսպան Մարիանո Վերգարան իր հերթին նշել է, որ Կոնվերս բանկը Հայաստանում Արգենտինայի դեսպանատան հետ համագործակցության մեծ փորձ ունի տարբեր ոլորտներում: Բանկի աջակցությամբ են իրականացվել այնպիսի նախաձեռնություններ, ինչպիսիք են Արգենտինական տանգոյի օրերը Հայաստանում, Բրյուսովի անվան համալսարանում Արգենտինական կենտրոնի բացումը և այլն: «Կոնվերս Բանկը հաջողված ներդրման հիանալի օրինակ է, կայացած բիզնես, որը կամուրջի դեր է ստանձնել երկու քաղաքակրթությունների միջև նաև մշակույթի, կրթության, առողջապահության ոլորտներում: Հուսով եմ, Պալատի գործունեության շնորհիվ շատ շուտով նման «կամուրջները» կավենանան»,-ասել է նա:

Կոնվերս Բանկը վերահսկվում է ԿԲ կողմից:–0–