Տրանսպորտն ու հաղորդակցությունները կարևոր ոլորտներ են Հարավային Կովկասի տարածաշրջանում ներդրումների համար․ ՎԶԵԲ–ի ղեկավար
ԵՐԵՎԱՆ, 7 մայիսի․/ԱՌԿԱ/․ Տրանսպորտն ու հաղորդակցությունները կարևոր ոլորտներ են Հարավային Կովկասի տարածաշրջանում ներդրումների համար։ Այս մասին հայտարարել է ՎԶԵԲ նախագահ Օդիլ Ռենո-Բասոն Երևանում բանկի տարեկան հանդիպման և գործարար համաժողովի նախաշեմին կայացած մամուլի ասուլիսում։
«Մասնավորապես, կովկասյան միջանցքի և Կենտրոնական Ասիայի հետ կապի համատեքստում։ Մենք ներդրումներ ենք կատարել տարածաշրջանում, այն է՝ Հայաստանի և Վրաստանի միջև սահմանային ենթակառուցվածքում, Սիսիան-Քաջարան ճանապարհահատվածի կառուցման մեջ՝ Հյուսիս–Հարավ միջանցքի շրջանակում,- ասաց Ռենո-Բասոն:
Ավելի վաղ հաղորդվում էր, որ ՎԶԵԲ–ը կֆինանսավորի Հյուսիս–Հարավ միջազգային տրանսպորտային միջանցքի Սիսիան–Քաջարան ճանապարհի 24 կմ երկարությամբ հարավային հատվածի շինարարությունը։
Սյունիքի մարզի Սիսիան-Քաջարան նոր ճանապարհը (60 կմ երկարությամբ, ներկայիս 130 կմ-ի փոխարեն) Հայաստանի պատմության մեջ ճանապարհաշինական ամենախոշոր նախագիծն է։ Դրա շրջանակում կկառուցվի 27 կամուրջ և 9 թունել։ Նախագծի ընդհանուր արժեքը գնահատվում է մոտ 1 մլրդ դոլար: Ակնկալվում է, որ այս ճանապարհի մյուս հատվածների շինարարությունը կֆինանսավորվի Եվրոպական ներդրումային բանկի (ԵՆԲ), Ասիական զարգացման բանկի (ԱԶԲ) և Հայաստանի կառավարության կողմից:
ՎԶԵԲ-ը առաջատար ինստիտուցիոնալ ներդրողներից է Հայաստանում: Հայաստանում Բանկի հիմնական առաջնահերթություններից են ընկերությունների մրցունակության բարձրացումը և ֆինանսական հատվածի միջնորդությանն աջակցելը ռիսկերի բաշխման պրոդուկտների միջոցով: Հայաստանում իր գործունեության ընթացքում ՎԶԵԲ-ը 210 ծրագրերի շրջանակում ներդրել է 2,5 մլրդ եվրո՝ էներգետիկայի, ենթակառուցվածքների, հեռահաղորդակցության և ֆինանսների ոլորտներում։
«ԱՌԿԱ» գործակալությունը ՎԶԵԲ–ի տարեկան հանդիպման և գործարար համաժողովի ինֆորմացիոն հովանավորն է։
