Երևանի շոկոլադի գործարանը 2021թ–ին նախատեսում է արտահանման ծավալները հասցնել մոտ 6մլն դոլարի, իսկ 2024 թ.–ին`շուրջ 20 մլն դոլարի

ԵՐԵՎԱՆ, 22 փետրվարի./ԱՌԿԱ/. ՀՀ էկոնոմիկայի նախարար Վահան Քերոբյանն այցելել է Երևանի շոկոլադի գործարան՝ ծանոթանալու ընկերության գործունեությանը և խնդիրներին։

Ինչպես հայտնում են նախարարության մամուլի ծառայությունից, 160 անուն արտադրանք թողարկող և 16 երկրներ արտահանող (Ռուսաստան, Վրաստան, Բելգիա, Ֆրանսիա, ԱՄՆ, Իսրայել, Ուկրաինա, Չինաստան, Ղազախստան, Թուրքմենիա, Բելառուս, Էստոնիա, Մոնղոլիա, Շվեդիա, Ավստրիա, Նիդերլանդներ) ընկերությունը, որը 2019 թվականին նախորդ տարվա համեմատ իրացման ծավալներն ավելացրել է շուրջ 30%-ով, 2020 թվականին դժվարություններ է կրել և արդյունքում 2019-ի համեմատ իրացման ծավալները նվազել են 15,7%-ով։ Այդուհանդերձ, բաժնետերերի կողմից կատարվել է 100,0 մլն դրամի կանոնադիր կապիտալի համալրում։

Գործարանը նախաձեռնել է տեղական մրգերից չրերի, շոկոլադապատ չրերի ու չրերի հիմքով այլ կոնֆետների արտադրության ծրագիր, որի իրականացման արդյունքում զգալիորեն կմեծանան արտադրության և իրացման ծավալները և կստեղծվի շուրջ 400 նոր աշխատատեղ։

«2021թ․ նախատեսվում է ընդլայնել արտահանվող երկրների աշխարհագրությունը և քառապատկել արտահանման ծավալները՝ հասցնելով շուրջ 6․0 մլն ԱՄՆ դոլարի, իսկ 2024 թվականին արտահանման ծավալները նախատեսվում է հասցնել շուրջ 20․0 մլն ԱՄՆ դոլարի», – նշվում է հաղորդագրության մեջ։

Գործարանն առաջիկայում նախատեսում է իրականացնել խոշոր ներդրումներ՝ արտադրական և պահեստային տարածքների ընդլայնման և նոր սարքավորումների ձեռքբերման համար։  

Գործարանի գործունեությունը նպաստել է այգեգործության ու գործընկեր կազմակերպությունների՝ տպարանների, լոգիստիկ և շինարարական ընկերությունների զարգացմանը և դրանցում նոր աշխատատեղերի ստեղծմանը։

Վահան Քերոբյանը և գործարանի հիմնադիր տնօրեն Սոս Սահակյանը քննարկել են գործարանի զարգացման ծրագիրը։ Գործարանի տնօրենը նախարարին ներկայացրել է ծրագրի իրագործմանը խոչընդոտող որոշ խնդիրներ, որոնցից մեկը ֆինանսական միջոցների հասանելիությունն է, և խնդրել նախարարության աջակցությունը։

Շեշտվել է նաև խորհրդատվական աջակցության անհրաժեշտությունը։