ՀՀ ԴԱՀԿ ծառայության պետը հրաժարական է տվել` պանամական սկանդալի ֆոնին
ԵՐԵՎԱՆ, 18 ապրիլի./ԱՌԿԱ/. ՀՀ դատական ակտերի հարկադիր կատարման ծառայության պետ Միհրան Պողոսյանը հրաժարական է տվել` պանամական սկանդալի ֆոնին։
«Հայկական և միջազգային մամուլում վերջերս պանամական օֆշորների մասին հրապարակումներում ի հայտ եկավ նաև իմ անունը։ Ցավում եմ, որ անունս արծարծվում է միլիարդավոր դոլարներ իրականում սեփականացրած՝ Ադրբեջանի նախագահ Իլհամ Ալիևի ընտանիքի կողքին»,– նշվում է Պողոսյանի հայտարարության մեջ, որը երկուշաբթի տարածել է ԴԱՀԿ–ի մամուլի ծառայությունը։
Պողոսյանն անընդունելի է համարել, որ իր անձը պատճառ դառնա Հայաստանի և բռնապետական Ադրբեջանի միջև քաղաքակրթական որևէ զուգահեռի։
«Ինչի համար էլ այսօր իմ հրաժարականի դիմումն եմ ներկայացրել զբաղեցրածս պաշտոնից։ Օֆշորային հրապարակումներին հրապարակավ կանդրադառնամ արդեն որպես շարքային քաղաքացի՝ առանց պետական լծակներ տիրապետելու», – հայտարարել է Պողոսյանը։ –0–
