Ադրբեջան-Վրաստան-Հայաստան երկաթգծով Հայաստան է հասել 22 վագոն բենզինով բեռնված գնացքը
ԵՐԵՎԱՆ, 19 դեկտեմբերի․/ԱՌԿԱ/․ Դեկտեմբերի 19-ին Ադրբեջան-Վրաստան-Հայաստան երկաթգծով Հայաստան է հասել 22 վագոն բենզինով բեռնված գնացքը, հայտնում է «Առաջին լրատվականը»։
Դա հնարավոր է դարձել բեռնափոխադրումների սահմանափակումների վերացման արդյունքում:
Այս պայմանավորվածությունը ձեռք էր բերվել նոյեմբերի 28-ին Գաբալայում ՀՀ և Ադրբեջանի փոխվարչապետներ Մհեր Գրիգորյանի և Շահին Մուստաֆաևի հանդիպման ժամանակ:
Վառելիքը գնվել է Ադրբեջանից: Բեռը պատկանում է մասնավոր երկու ընկերությունների: Ընդհանուր 1218 տոննա A95 տեսակի պրեմիում ավտոբենզին է:
Ադրբեջանից Հայաստան երկաթուղային բեռնափոխադրումները հնարավոր են դարձել օգոստոսի 8-ին Վաշինգտոնում Հայաստանի և Ադրբեջանի միջև արձանագրված պայմանավորվածությունների, ինչպես նաև Միացյալ Նահանգների և Հայաստանի կառավարությունների միջև ստորագրված փոխըմբռնման հուշագրերի շնորհիվ:
Ավելի վաղ Ադրբեջանի տարածքով ռուսական և ղազախական ցորենով բեռնված գնացքներ էին ժամանել Հայաստան:
