Հայաստանը շահագրգռված է ԱՄԷ-ից տեխնոլոգիաների և բարձրորակ ապրանքների ներկրմամբ. նախարար

ԵՐԵՎԱՆ, 5 մայիսի․/ԱՌԿԱ/. Հայաստանը հետաքրքրված է ԱՄԷ-ից բարձրորակ ապրանքների և առաջադեմ տեխնոլոգիաների ներկրմամբ, ինչպես նաև ներդրումային ծրագրերի իրականացմամբ՝ տնտեսության արդիականացման նպատակով։

Այս մասին հայտարարել է ՀՀ Էկոնոմիկայի նախարար Գևորգ Պապոյանը՝ Արաբական Միացյալ Էմիրությունների առաջադեմ գիտության և տեխնոլոգիաների հարցերով արտաքին գործերի նախարարի տեղակալ Օմրան Շարաֆիի և Հայաստանում ԱՄԷ արտակարգ և լիազոր դեսպան Նարիման Ալ-Մուլլայի հետ հանդիպման ժամանակ։

Ինչպես հայտնել է ՀՀ Էկոնոմիկայի նախարարության մամուլի ծառայությունը, Գևորգ Պապոյանը բարձր է գնահատել վերջին տարիներին տնտեսության ոլորտում ԱՄԷ-ի հետ ձևավորված սերտ գործակցությունը։

Նշվել է, որ Հայաստանը բաց է Էմիրաթական ներդրումների համար լոգիստիկայի, ենթակառուցվածքների, վերականգնվող էներգետիկայի, զբոսաշրջության, բարձր տեխնոլոգիաների, գյուղատնտեսության, արդյունաբերության և այլ ոլորտներում։

Անդրադարձ է կատարվել նաև ՀՀ կառավարության կողմից մշակված «Խաղաղության խաչմերուկ» ծրագրին, դրա առանձին բաղադրիչներին՝ ընդգծելով ծրագրի կարևորությունը տարածաշրջանի խաղաղ և կայուն զարգացման համար:

Հայաստան-ԱՄԷ առևտրաշրջանառության մասին

Ըստ ՀՀ վիճակագրական կոմիտեի տվյալների՝ 2025 թվականին Հայաստանի և ԱՄԷ-ի միջև ապրանքաշրջանառության ծավալը գերազանցել է 2,13 մլրդ դոլարը (տարեկան անկումը՝ 60%): Ընդ որում, Հայաստանից արտահանման ցուցանիշը կազմել է ավելի քան 2,05 մլրդ դոլար (անկումը՝ 60,9%), իսկ ներմուծումը՝ ավելի քան 425 մլն դոլար (անկումը՝ 4,9%):

«Խաղաղության խաչմերուկ» նախագծի մասին

Տարածաշրջանային հաղորդակցությունների հայկական «Խաղաղության խաչմերուկ» նախագիծը ՀՀ վարչապետ Նիկոլ Փաշինյանի կողմից ներկայացվել է 2023 թվականի նոյեմբերին Թբիլիսիում կայացած «Մետաքսի ճանապարհ» համաժողովի ժամանակ։

Նախագծի առանցքային գաղափարն է Հայաստանի, Վրաստանի, Թուրքիայի, Ադրբեջանի և Իրանի միջև տրանսպորտային հաղորդակցությունների գործարկումը (վերագործարկումը) և զարգացումը՝ ավտոմոբիլային ճանապարհների, երկաթուղային գծերի, մալուխների, խողովակաշարերի և էլեկտրահաղորդման գծերի գործադրման միջոցով։

Սա թույլ կտա ստեղծել կարճ և արդյունավետ ուղի Կասպից ծովի և Միջերկրական ծովի միջև, ինչպես նաև երթուղի՝ Պարսից ծոցից մինչև Սև ծով:

Ըստ Հայաստանի դիրքորոշման՝ բոլոր ենթակառուցվածքները գործում են այն երկրների ինքնիշխանության և իրավազորության ներքո, որոնց տարածքով անցնում են. յուրաքանչյուր երկիր իր տարածքում իրականացնում է սահմանային և մաքսային հսկողություն, ապահովում է դրանցով բեռների, տրանսպորտային միջոցների և մարդկանց տեղաշարժի անվտանգությունը։