Հարավկովկասյան երկաթուղին ու Յակուտիայի երկաթուղին ստորագրել են երկկողմանի համագործակցության զարգացմանն ուղղված համաձայնագիրը

ԵՐԵՎԱՆ, 19 մարտի. /ԱՌԿԱ/. «Հարավկովկասյան երկաթուղի» ՓԲԸ-ի գլխավոր տնօրեն Վիկտոր Ռեբեցը և «Յակուտիայի երկաթուղի» ԲԲԸ-ի գլխավոր տնօրեն Վասիլի Շիմոխինը մարտի 19-ին ստորագրեցին երկկողմանի համագործակցությանն ուղղված համաձայնագիրը:

Ինչպես հայտնում են ՀԿԵ մամուլի ծառայությունից, այս համաձայնագրի շրջանակում Հայաստանի և Յակուտիայի երկաթուղիները մասնավորապես փոխանակվելու են երկաթուղային բեռնափոխադրումների և ուղևորափոխադրումների կազմակերպման, շարժակազմի սպասարկման, գնացքների անվտանգության ապահովման ոլորտներում կուտակած փորձով:

Կողմերը նաև համագործակցելու են տեղեկատվական և իմիջային քաղաքականության, կորպորատիվ գործընթացների և կառավարման ոլորտներում:
Համաձայնագրով հատուկ կարևորվում են մշակութակրթական գործունեությունը և երեխաների, երիտասարդության ու ՀԿԵ և ՅԵ աշխատողների ընտանիքների անդամների հետ աշխատանքը: Մասնավորապես, կողմերը համատեղ կաշխատեն տարաբնույթ մարզական միջոցառումների կազմակերպման, երկաթուղիների աշխատողների, նրանց երեխաների և ընտանիքների անդամների հանգստի կազմակերպման հարցերում:

Երկկողմանի համագործակցության այլ ուղղություններից են նաև երիտասարդության ռազմահայրենասիրական դաստիարակությունը, միջազգային բարեկամական կապերի ամրապնդումը, կամավորական, հայրենասիրական, վետերանական շարժումների կազմակերպումը, կադրային ներուժի ձևավորումն ու զարգացումը, արհմիութենական կապերի զարգացումը:
ՀԿԵ ՓԲԸ գլխավոր տնօրեն Վիկտոր Ռեբեցը նշեց, որ ընկերությունների համագործակցությունը հատկանշական է նրանով, որ երկու երկաթուղիները հանդիսանում են «Ռուսական երկաթուղիներ» ԲԲԸ-ի դուստր-ձեռնարկություններ, որոնք փոխադրումների ոլորտում լիարժեք գործունեություն են ծավալում:

«Մենք ունենք քննարկման ընդհանուր թեմաներ: Մեր ընկերություններն աշխատում են նման պայմաններում, համեմատելի են աշխատանքի ծավալներն ու երկաթուղիների երկարությունը: Այս համաձայնագիրը կարգավորելու է համագործակցությունն ոչ միայն արտադրական ոլորտում, այլ նաև կապերը սոցիալ-մշակութային, երիտասարդության հետ աշխատանքի, արհմիությունների գործունեության և կադրային ոլորտներում: Մենք հետաքրքրված ենք ուսումնասիրել կոլեգաների փորձը և կիրառել այն մեր աշխատանքի մեջ», - ասաց Վիկտոր Ռեբեցը:

«Յակուտիայի երկաթուղի» ԲԲԸ–ի գլխավոր տնօրեն Վասիլի Շիմոխինը  իր հերթին նշեց, որ՝ չնայած առկա ընդհանուր գծերի, յակուտական երկաթուղին ունի ավելի փոքր անձնակազմ և զգում է որակավորված կադրերի պակաս: Ընկերության ղեկավարն ասաց, որ մտադիր է Հայաստան գործուղել 15 մասնագետ՝ հայկական փորձի հետ ծանոթանալու համար:
Նա նաև տեղեկացրել է, որ «ՅԵ»-ի համար 2014 թվականն անցնում է Բայկալ-Ամուր մայրուղու կառուցման 40-ամյակի ներքո, հիշեցնելով, որ կառուցմանը մասնակցում էին նաև հայ մասնագետները: Շիմոխինի խոսքով` հայ մասնագետները նույնպես հրավիրվելու են տոնակատարություններին մասնակցելու համար:

«Դա լինելու է մեր հարգանքի նշան, որը վկայելու է, որ մենք հիշում ենք նրանց ավանդի մասին», - ընդգծեց Վասիլի Շիմոխինը:

«ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի 100% դուստր ընկերությունը և իրականացնում է «Հայկական երկաթուղիներ» ՓԲԸ-ի կոնցեսիոն կառավարումը: Համաձայն 2008թ.–ի փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի, կողմերի փոխադարձ համաձայնությամբ ևս 10 տարի երկարացման իրավունքով:-0-