Համբուրգի նավահանգիստը հետաքրքրված է Գյումրիի «չոր նավահանգիստ» նախագծով
ԵՐԵՎԱՆ, 11 դեկտեմբերի․/ԱՌԿԱ/․ Համբուրգի նավահանգիստը հետաքրքրված է մասնակցելու հայկական Գյումրի քաղաքում «չոր նավահանգստի» ստեղծման նախագծին, հայտնել է ՀՀ վարչապետ Նիկոլ Փաշինյանը։
«Նրանք (Համբուրգի նավահանգստի ղեկավարությունը) ինձ հետ զրույցում հաստատեցին իրենց հետաքրքրությունը, որն առավել ակտիվացել է հատկապես պլանավորվող տարածաշրջանային ծրագրերի համատեքստում»,- ասել է Փաշինյանը լրագրողներին Համբուրգում։
Նրա խոսքով՝ տեղի գործարարների հետ քննարկումների ժամանակ անդրադարձ է կատարվել բավականին ծանրակշիռ թեմաների և ձևավորվել է օրակարգ։
Գյումրու «Չոր նավահանգստի» մասին
Ավելի վաղ հաղորդվել էր, որ Հայաստանի կառավարությունը նախատեսում է դրա մեջ ներդնել $37 մլն.։ Ըստ նախագծի՝ «չոր նավահանգիստը» հարակից կլինի ինչպես «Շիրակ» միջազգային օդանավակայանին, այնպես էլ երկաթուղուն և «Հյուսիս-Հարավ» տրանսպորտային միջանցքին։
Այն կներառի ազատ տնտեսական գոտու կարգավիճակ ունեցող օդանավակայան, բաշխիչ կենտրոններ (հաբեր), փոքր և միջին ձեռնարկություններ, թեթև արդյունաբերության օբյեկտներ, արտադրական բազաներ, հոսքագծեր և միջազգային պարենային շուկա։
Նախատեսվում է, որ Շիրակի մարզը կվերածվի արդյունաբերական գոտու, իսկ «ցամաքային նավահանգիստը» կդառնա բազմաֆունկցիոնալ և բազմամոդալ հանգույց՝ սպասարկելու համար տարածաշրջանային և միջազգային այն ընկերություններին, որոնք մաքսային գործընթացների համախմբման կարիք ունեն։
