ՀՀ կառավարությունը մասամբ կփոխհատուցի կարկտահարությունից վնասներ կրած հողօգտագործողներին
ԵՐԵՎԱՆ, 9 հոկտեմբեր․/ԱՌԿԱ/. Կառավարության այսօրվա նիստում գործադիրը որոշում կայացրեց 2024-2025 թթ.-երին կարկտահարության պատճառած վնասը գյուղացիներին մասնակի փոխհատուցել։
«Փոխհատուցման չափի հաշվարկը կատարվել է մշակաբույսերի մշակության հիմնական ծախսերի հիման վրա, որպեսզի կայունացնենք գյուղացիական տնտեսություններում ֆինանսական վիճակը և ստացած միջոցների հաշվին հաջորդ գյուղատնտեսական տարում հնարավորություն ունենան կազմակերպել գյուղատնտեսական գործունեություն»,-ասել է Էկոնոմիկայի նախարար՝ Գևորգ Պապոյանը՝ ներկայացնելով 2024 և 2025 թվականներին Հայաստանի Հանրապետության Արագածոտնի, Արարատի, Արմավիրի, Գեղարքունիքի, Լոռու, Շիրակի, Տավուշի և Սյունիքի մարզերում տեղացած կարկուտի հետևանքով հողօգտագործողներին պատճառված վնասների մասնակի փոխհատուցման տրամադրման կարգը հաստատելու մասին նախագիծը։
Պապոյանը նշել է, որ գյուղատնտեսական ապահովագրության փորձնական ծրագիրը գործարկվել է 2020-ից, սակայն բարձր վնասաբերության պատճառով ապահովագրական ընկերությունները խուսափում են պայմանագրեր կնքել։
«2025թ.-ին կառավարությունը սուբսիդավորել է ապահովագրավճարի 70-80 տոկոսը և փոխհատուցել վնասաբերության 200 տոկոսը գերազանցող մասը, սակայն ապահովագրության ծավալները մնացել են շատ փոքր»,- ասել է Պապոյանը։
«Նախագծով առաջարկվում է և 2024 և 2025 թթ.–ին կարկուտի հետևանքով պատճառված վնասների դիմաց մասնակի փոխհատուցում տրամադրել այն հողօգտագործողներին, որոնց կողմից օգտագործվող ցանքատարածություններում և այգետարածքներում կարկուտի հասցված վնասը կազմել է 40–ից 100 %»,-ասել է նախարարը։
Նախարարը նաև հավելել է, որ նախագծով սահմանվում է նաև, որ այն ֆերմերները, որոնք արդեն կառավարության կողմից ստացվել են, ստացել են ծախսերի փոխհատուցում գարնանացան մշակաբույսի մշակության համար 24-25 թթ.–ին։
«Օրինակ՝ ծիրանի այգու 100% վնասի դեպքում՝ 31,840 դրամ, կարտոֆիլի դեպքում՝ 446,950 դրամ, բանջարաբոստանային մշակաբույսերի դեպքում՝ 130,900 դրամ, աշնանացան ցորենի դեպքում՝ 55,328 դրամ»,- նշել է նախարարը։
Նախարարը ներկայացրել է, թե ինչպես պետք է դիմել աջակցություն ստանալու համար։
«Աջակցությունից օգտվելու համար շահառուները մինչև 2025 թ.-ի հոկտեմբերի 31–ը դիմում են համայնքին։ Վերջիններս էլ մինչև նոյեմբերի 10-ին ամփոփում են ստացված դիմումները և ներկայացնում մարզային հանձնաժողովներ, որոնք 3 աշխատանքային օրվա ընթացքում քննարկում են ներկայացված ակտերն ու հիմնավորումները և ներկայացնում հանրապետական հանձնաժողովի հաստատմանը»,-եզրափակել է Պապոյանը։
