«Պիցցա Տաշիր» ՍՊԸ տնօրենը 1 ամսով կալանավորվել է. ՔԿ
ԵՐԵՎԱՆ, 11 հուլիսի․/ԱՌԿԱ/․ «Պիցցա Տաշիր» ՍՊԸ տնօրեն Վաղինակ Ղազարյանը 1 ամսով կալանավորվել է։ Տեղեկությունը «Նովոստի- Արմենիա»-ի հետ զրույցում հաստատեց ՔԿ մամուլի քարտուղար Կիմա Ավդալյանը։
«Պիցցա Տաշիր» ՍՊԸ տնօրենի նկատմամբ հարուցվել է հանրային քրեական հետապնդում՝ Քրեական օրենսգրքի 290-րդ հոդվածի 3-րդ մասի 1-ին և 2-րդ կետերով (մի խումբ անձանց կողմից նախնական համաձայնությամբ առանձնապես խոշոր չափերով հարկերը, տուրքերը կամ այլ վճարներ չվճարելը):
«Վերջինիս նկատմամբ որպես խափանման միջոց կիրառվել է կալանքը»,- նշեց ՔԿ մամուլի խոսնակը։
Հունիսի 3-ին Քննչական կոմիտեից հայտնել են, որ «Տաշիր գրուպ»–ի գործով քրեական վարույթով 2 անձ կալանավորվել է, ևս երկուսի կալանքի հարցով ընթանում է դատական նիստ։
Հունիսի 2-ին ՔԿ մամուլի քարտուղար Կիմա Ավդալյանը հայտնել էր, որ Քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի նախաքննության ընթացքում «Տաշիր գրուպի» գլխավոր գրասենյակում իրականացվել են անհետաձգելի քննչական գործողություններ։
