Որ դեպքում կառավարությունը բիզնեսին կազատի մաքսազերծման վճարներից․ Պապոյանը մանրամասնել է (ՎԻԴԵՈ)
ԵՐԵՎԱՆ, 7 հունվարի․/ԱՌԿԱ/․ ՀՀ Էկոնոմիկայի նախարար Գևորգ Պապոյանը Facebook-ի իր էջում անդրադարձել է մաքսատուրքի արտոնության ծրագրին և հայտնել, թե որ դեպքում է կառավարությունը ազատում գործարարներին մաքսատուրքի վճարման պարտավորությունից։
«Այն գործարարները, ներդրողները, որոնք կառավարության կողմից հայտարարված գերակա ոլորտներում ներդրումներ են իրականացնում և ներմուծում են հումք կամ սարքավորումներ 3-րդ երկրներից, ոչ ԵԱՏՄ երկրներից, կառավարությունը նրանց ազատում է մաքսատուրքի վճարման պարտավորությունից», - ասել է նախարարը։
Պապոյանի խոսքով՝ նախորդ տարվա ընթացքում այդպիսի 67 նախաձեռնություն աջակցություն է ստացել, և ստեղծվել է 3405 աշխատատեղ։
«ՀՀ Կառավարությունը կտրամադրի այդ արտոնությունը ցանկացած գործարարի, ցանկացած ներդրողի, ով նախապես հայտարարված գերակա ոլորտներում ներդրումներ կիրականացնի, ցանկացած՝ առանց բացառության», - շեշտել է նախարարը:
Պապոյանը հայտնել է, որ նախորդ տարվա ընթացքում 100 մլն 500 հազար դոլարի աջակցություն է տրամադրվել:
Նրա խոսքով՝ այս գումարից 1 մլն 200 հազար դոլարը պետք է ՀՀ պետական բյուջե մտներ, և 99 մլն 300 հազար դոլարը ԵԱՏՄ երկրների բյուջեներ պետք է գնար, բայց կառավարությունը նախընտրել է, որ 100 մլն 500 հազարը մնար ՀՀ-ում, և ստեղծվեն աշխատատեղեր, վճարվեն հարկեր, զարգանա Հայաստանի տնտեսությունը և, հետևաբար, Հայաստանի Հանրապետությունը:
Նախարարը կոչ է արել այդպիսի նախաձեռնությունների առկայության դեպքում դիմել՝ կրկին հիշեցնելով, որ կառավարությունը աջակցում է բոլոր նախաձեռնություններին։
