Յունիբանկի VISA DIGITAL քարտերը դարձել են անվճար
ԵՐԵՎԱՆ, 17 նոյեմբերի․/ԱՌԿԱ/․ Յունիբանկի Visa թվային քարտերը դարձել են անվճար ռեզիդենտ հաճախորդների համար: Թվային քարտն ակնթարթորեն կարելի է ստեղծել UNIMobile հավելվածի միջոցով՝ պարզապես ընտրելով նախընտրած դիզայնը և արժույթը՝ ՀՀ դրամ, ԱՄՆ դոլար կամ եվրո, հաղորդում է Յունիբանկի մամուլի ծառայությունը։
Թողարկումից անմիջապես հետո քարտը հասանելի է դառնում առցանց վճարումների և փոխանցումների համար, այն նաև կարող է կցվել Apple Pay-ին և Google Pay-ին՝ անհպում վճարումների համար:
Թվային քարտը կարելի է համալրել ցանկացած պահի՝ այլ քարտերից կամ հաշիվներից փոխանցման միջոցով:
Visa Digital քարտերը կոչված են անկանխիկ վճարումն առավել հեշտ և հարմարավետ դարձնելու: Դրանք հարմար են օգտագործման համար, ապահով են և միշտ հասանելի են հեռախոսում:
Թվային քարտը հատկապես հարմար է նրանց, ովքեր հաճախ են առցանց գնումներ կատարում արտասահմանյան կայքերից և անվտանգության ապահովման նպատակով նախընտրում են վճարումները կատարել առանձին քարտով:
Յունիբանկը հետևողական կերպով զարգացնում է թվային ծառայությունները և ժամանակակից սպասարկումը ՝ ֆինանսական ծառայությունները դարձնելով ավելի հարմար և անվտանգ: Թվային քարտերի առաջմղումը և դրանց մատչելիության բարձրացումը նաև աջակցում է բանկի ESG՝ «կանաչ» օրակարգին, քանի որ թվային լուծումներին անցումն օգնում է կրճատել պլաստիկի օգտագործումն ու նվազեցնել շրջակա միջավայրի վրա ազդեցությունը:
