Հայաստանում գործազուրկների թիվը սեպտեմբերին կրճատվել է 9,3%–ով, իսկ վարձու աշխատողների թիվն ավելացել է 5,6%–ով․ Ֆիննախ
ԵՐԵՎԱՆ, 5 դեկտեմբերի․/ԱՌԿԱ/․ Հայաստանում սեպտեմբերին պաշտոնապես գրանցված գործազուրկների թիվը նվազել է 9,3%-ով, իսկ վարձու աշխատողների թիվն աճել է 5,6%-ով և կազմել 776 814 մարդ, ինչը հիմնականում պայմանավորված է շինարարության, առևտրի և կրթության ոլորտներում աշխատողների թվի աճով։ Այս մասին ասվում է ՀՀ ֆինանսների նախարարության «Մակրոտնտեսական զարգացումների ակնարկ. հոկտեմբեր 2024» հաշվետվության մեջ։
Նշվում է նաև, որ սեպտեմբերին բարձր տնտեսական ակտիվության պայմաններում, նախորդ տարվա նույն ամսվա համեմատ, միջին անվանական աշխատավարձը Հայաստանում աճել է 6,8%-ով՝ կազմելով 279 279 դրամ։ Միաժամանակ պետական հատվածում աշխատավարձերն աճել են 7,2%-ով`մինչև 218 809 դրամ, իսկ մասնավոր հատվածում՝ 6,5%-ով՝ մինչև 303 014 դրամ։
«Իրական աշխատավարձը 0,6 տոկոս գնաճի պայմաններում աճել է 6,1 տոկոսով»,- նշվում է ուսումնասիրության մեջ։
Ինչպես նշվել է ՀՀ էկոնոմիկայի նախարարության նախկինում հրապարակված «Հայաստան. տնտեսական հեռանկարներ. 2024 թվականի հունվար-սեպտեմբեր» զեկույցում, 2024 թվականի սեպտեմբերին Հայաստանում ամենաբարձր վարձատրվող 3 ճյուղերն են ՏՏ–ն (835,840 դրամ), ֆինանսական և ապահովագրական գործունեությունը (809,417 դրամ), և հանքարդյունաբերությունն ու քարհանքը (478,763 դրամ):
2023 թվականի սեպտեմբերի համեմատ՝ միջին աշխատավարձի աճ է գրանցվել զբաղվածության բոլոր ոլորտներում՝ բացառությամբ տեղեկատվության և կապի, շինարարության, էլեկտրաէներգիայի ոլորտների։
Ամենաբարձր աճը գրանցվել է հետևյալ ոլորտներում՝ ֆինանսական և ապահովագրական գործունեություն (40,4%), գյուղատնտեսություն, անտառային տնտեսություն և ձկնորսություն (13,5%), ինչպես նաև վերամշակող արդյունաբերություն (13,1%)։
