Հայաստանը Հարավային Կովկասի առաջատարն է բնակչության մեկ շնչին ընկնող ՀՆԱ-ի ցուցանիշով․ ԱՄՀ

ԵՐԵՎԱՆ, 22 դեկտեմբերի․/ԱՌԿԱ/․ Հայաստանն առաջատարն է Հարավային Կովկասի տարածաշրջանում մեկ շնչին ընկնող ՀՆԱ-ի ցուցանիշով, ասվում է Արժույթի միջազգային հիմնադրամի կայքում։

Այսպես, ԱՄՀ-ի տվյալներով, մեկ շնչին ընկնող ՀՆԱ-ն Հայաստանում 2023 թվականին կազմել է 8280 դոլար, Վրաստանում՝ 8160 դոլար, Ադրբեջանում՝ 7530 դոլար։

Ընդ որում, Իրանում այս ցուցանիշը կազմում է 4230 դոլար, Ռուսաստանում՝ 13 հազար 10 դոլար, իսկ Թուրքիայում՝ 13 հազար 380 դոլար։

Թվեր և կանխատեսումներ Հայաստանի տնտեսության վերաբերյալ

Հայաստանի տնտեսական աճը 2023 թվականի պետբյուջեում նախատեսված է 7%, իսկ գնաճն ամրագրվել է 4% (±1,5%)։ Ազգային վիճակագրական կոմիտեի նախնական տվյալներով՝ Հայաստանի ՀՆԱ-ն 2023 թվականի երրորդ եռամսյակում, 2022 թվականի նույն ժամանակահատվածի համեմատ, աճել է 7,4 տոկոսով։

Կենտրոնական բանկի դեկտեմբերյան կանխատեսմամբ՝ 2023 թվականին Հայաստանի տնտեսությունը կաճի 8,3 տոկոսով։ Fitch-ը հայկական տնտեսության աճը կանխատեսում է 2023 թվականին մինչև 6,1%, Moody's-ը՝ մինչև 7%, իսկ S&P-ը՝ 7,5%։ Համաշխարհային բանկի գնահատականներով՝ Հայաստանի ՀՆԱ-ի աճն այս տարի կկազմի 4,4%, ԵԱԶԲ-ն չի բացառում, որ Հայաստանի տնտեսությունը կաճի ավելի քան 7,5%–ով, ՎԶԵԲ-ը Հայաստանի տնտեսության աճը գնահատում է 6,5%, իսկ ԱՄՀ-ն կանխատեսում է 7%-անոց տնտեսական աճ։–0–