Ռուսաստանն այլևս բնական գազ չի մատակարարում Բալթյան երկրներ
04.04.2022,
12:27
Ապրիլի սկզբից Բալթյան երկրները՝ Լատվիան, Լիտվան և Էստոնիան, այլևս Ռուսաստանից բնական գազ չեն ստանում
ԵՐԵՎԱՆ, 4 ապրիլի. /ԱՌԿԱ/. Ապրիլի սկզբից Բալթյան երկրները՝ Լատվիան, Լիտվան և Էստոնիան, այլևս Ռուսաստանից բնական գազ չեն ստանում, լատվիական ռադիոյին ասել է բնական գազի համակարգի օպերատոր JSC Conexus Baltic Grid (Conexus) ընկերության խորհրդի նախագահ Ուլդիս Բարիսը։
Նա նշել է, որ գազ մատակարարում են երկու մատակարարներ՝ Կլայպեդայի հեղուկ գազի տերմինալը և Ինչուկալնսի ստորգետնյա գազի պահեստարանը, գրում է «Ինտերֆաքս»-ը։
Conexus-ի ղեկավարն ընդգծել է, որ Ռուսաստանի հայտարարությունն այն մասին, որ իր կողմից մատակարարվող բնական գազի դիմաց հնարավոր կլինի վճարել միայն ռուսական ռուբլով, դարձել է ազդանշան Ռուսաստանից մատակարարումների կտրուկ կրճատման անհրաժեշտության մասին, քանի որ դրանց վրա այլևս չի կարելի հույս դնել։
«Եթե դեռ կասկածներ կային, թե արդյոք կարելի է հույս դնել ռուսական մատակարարումների վրա, ապա այս իրադարձությունները հստակ ցույց են տալիս, որ հուսալիության տեսանկյունից նրանց վրա հույս դնել, փաստորեն, այլևս չի կարելի: Էներգետիկ անվտանգության տեսանկյունից պետությունը միանշանակ պ ետք է լուծի հեղուկ գազի երկրորդ տերմինալի կառուցման հարցը, և որքան արագ, այնքան լավ»,- ասել է Բարիսը։–0–