Վիետնամում ՀՀ դեսպանն ու Վիետնամի ԱԳ նախարարը քննարկել են երկու երկրների քաղաքացիների համար մուտքի արտոնագրի ազատականացման հարցը
ԵՐԵՎԱՆ, 12 օգոստոսի․/ԱՌԿԱ/․ Օգոստոսի 12-ին Վիետնամի Սոցիալիստական Հանրապետությունում Հայաստանի Հանրապետության արտակարգ և լիազոր դեսպան Սուրեն Բաղդասարյանը հանդիպեց Վիետնամի արտաքին գործերի նախարար Բույ Թան Շոնի հետ, հաղորդում է ՀՀ դեսպանությունը Վիետնամում։
Զրուցակիցները քննարկեցին տնտեսական, քաղաքական, կրթական, մշակութային և այլ ոլորտներում փոխհարաբերությունների օրակարգի ընդլայնմանն առնչվող մի շարք հարցեր:
Ընդգծվեց քաղաքական բարձր մակարդակի փոխայցերի նշանակությունը՝ երկկողմ հարաբերությունների դինամիկ զարգացման տեսանկյունից:
Ներկայացնելով «Խաղաղության խաչմերուկ» ծրագրի շրջանակներում տարածաշրջանային համագործակցության վերաբերյալ հայկական կողմի մոտեցումները՝ դեսպան Բաղդասարյանը կարևորեց Վիետնամի հետ կապերի ամրապնդումը միջազգային և տարածաշրջանային ձևաչափերում:
Հանդիպման ընթացքում քննարկվեցին նաև երկու երկրների քաղաքացիների համար մուտքի արտոնագրերի ազատականացման, զբոսաշրջության խթանման, Հայաստան-Վիետնամ ուղիղ չվերթների կազմակերպան և այլ հարցեր:
