ՀՀ-ում հարկային հանցագործությունների համար քրեական պատասխանատվության շեմը կբարձրացվի մինչև 30 մլն դրամ
ԵՐԵՎԱՆ, 16 ապրիլի․ /ԱՌԿԱ/․ ՀՀ ԱԺ-ն հինգշաբթի կայացած նիստում առաջին ընթերցմամբ ընդունեց «Հարկային օրենսգրքում և հարակից օրենքներում փոփոխություններ կատարելու մասին» նախագիծը։
Ինչպես հայտարարեց ՊԵԿ նախագահ Էդուարդ Հակոբյանը, Քրեական օրենսգրքում փոփոխություններով նախատեսվում է բարձրացնել հարկային հանցագործությունների համար քրեական պատասխանատվության գործող շեմերը։ Ներկայում խոշոր չափ է համարվում 10 մլն դրամից սկսած չվճարված հարկերի գումարը, իսկ առանձնապես խոշորը՝ 20 մլն դրամից սկսած։
Ըստ նրա՝ օրինագծով առաջարկվում է խոշոր չափի շեմը բարձրացնել մինչև 30 մլն դրամ, իսկ հաջորդող երկու տարիների պարտավորությունների մասով՝ մինչև 45 մլն դրամ։ Առանձնապես խոշոր չափի շեմն առաջարկվում է ավելացնել մինչև 25–50 մլն դրամ, իսկ հաջորդող երկու տարիների պարտավորությունների մասով՝ մինչև 75 մլն դրամ։
Հակոբյանը նշել է, որ սա թույլ կտա նման գործերի զգալի մասը տեղափոխել վարչական հարթություն և մեղմացնել քրեաիրավական հետևանքները մի շարք դեպքերում։
Բացի այդ, օրինագիծը նախատեսում է ՊԵԿ-ի գործողությունների կարգի փոփոխություն՝ ենթադրյալ հարկային հանցագործության մասին տեղեկատվություն ստանալիս։ Կոմիտեի ղեկավարի խոսքով՝ հարկային մարմինը չպետք է անմիջապես հանցագործության մասին հաղորդում ներկայացնի, այլ նախ պետք է տվյալները մշակի ներքին վերլուծական գործիքներով, ծանուցի հարկ վճարողին և փորձի ստանալ հիմնավորված բացատրություններ։
Եթե նման բացատրություններ չներկայացվեն, հարկային մարմինը կկարողանա թեմատիկ ստուգման շրջանակում արձանագրել խախտումը և կազմել վարչական ակտ, որը կարող է բողոքարկվել սահմանված կարգով։ Դրանից հետո միայն ՊԵԿ-ը որոշում կկայացնի հանցագործության մասին հաղորդում ուղարկելու վերաբերյալ։
Ինչպես ընդգծել է Հակոբյանը, բացառություն կկազմեն այն դեպքերը, երբ անհրաժեշտ են անհապաղ գործողություններ՝ փաստերի և ապացույցների կորուստը կանխելու համար։
Եվս մեկ փոփոխություն վերաբերում է թեմատիկ ստուգումներին։ Ըստ նրա՝ առաջարկվում է դրանց կարգավորումից հանել «ակնհայտորեն հայտնի գործարքի» վերաբերյալ դրույթները, ինչպես նաև վերացնել հարկային տարվա ընթացքում նման ստուգումները միայն մեկ անգամ անցկացնելու սահմանափակումը։
ՊԵԿ նախագահը հայտարարել է, որ տարեկան շուրջ 600 նախնական հաշվարկներից առնվազն կեսը կկարողանա տեղափոխվել վարչական ընթացակարգեր։
Օրինագիծը նաև այլընտրանքային մեխանիզմ է նախատեսում քրեական վարույթի շրջանակում գույքի կալանքի դեպքերի համար։ Մասնավորապես, առաջարկվում է, որ քննիչի, դատարանի որոշմամբ կամ հսկող դատախազի համաձայնությամբ գույքի կալանքը կարող է վերացվել դրա արժեքին հավասար բանկային երաշխիքի ներկայացման դեպքում:
