Վերջին 4 տարիներին Հայաստանը Հնդկաստանի հետ գործարքներ է կնքել սպառազինություն ձեռք բերելու համար
28.10.2024,
11:27
Հայաստանն ԱՄՆ-ի և Ֆրանսիայի հետ ընդգրկվել է հնդկական պաշտպանական արտադրանքի խոշորագույն ներկրողների թվում
ԵՐԵՎԱՆ, 28 հոկտեմբերի./ԱՌԿԱ/. Հայաստանն ԱՄՆ-ի և Ֆրանսիայի հետ 2023-2024 ֆինանսական տարում ընդգրկվել է հնդկական պաշտպանական արտադրանքի խոշորագույն ներկրողների թվում, գրում է The Times of India-ն։
Ըստ տվյալների՝ վերջին 4 տարիների ընթացքում Հայաստանը Հնդկաստանի հետ մի քանի գործարք է կնքել հրթիռների, հրետանու, հրթիռային համակարգերի, ռադարների, զրահաբաճկոնների և գիշերային տեսողության սարքերի, ինչպես նաև զինամթերքի և հրետանու լայն տեսականի ձեռք բերելու համար։ Հայաստանը դարձել է հնդկական մշակված «Ակաշ» ՀՕՊ հրթիռների առաջին օտարերկրյա գնորդը։
Նշվում է նաև, որ հնդկական պետական և մասնավոր ընկերությունները զենքի, զինամթերքի և բաղադրիչների լայն տեսականի են արտահանում մոտ 100 երկիր։ Անցած տարվա ընթացքում վաճառքը կազմել է 2,6 մլրդ դոլար։
