Հարկային ստուգումներ անցկացվելու են միայն ռիսկային ձեռնարկություններում. վարչապետ
ԵՐԵՎԱՆ, 15 սեպտեմբերի. /ԱՌԿԱ/. Հինգշաբթի ՀՀ վարչապետ Կարեն Կարապետյանը, որպես վարչապետ, իր առաջին կառավարական նիստի ժամանակ մի շարք հանձնարարականներ տվեց, այդ թվում, հարկային ոլորտին:
Ինչպես նշեց վարչապետը, բավական ակտիվ քննարկվում է, այդ թվում, հանրության կողմից, կաշառակերության հետ պայքարի հարցը: Այս կապակցությամբ նա հայտարարեց, որ այդ ուղղությամբ աշխատանքը շարունակվելու է, մասնավորապես, ստեղծվելու են աշխատանքները համակարգող հանձնաժողովներ:
«Նախևառաջ պետական մարմինները պետք է կատարեն իրենց վրա դրված գործառույթները, հետևաբար, անհրաժեշտ է ապահովել անազնիվների և որպես արտոնյալ ընկալվող խոշոր տնտեսական գործակալների և ներկրողների կողմից հարկային պարտավորությունների կատարումը», - ասաց Կարապետյանը:
Նրա խոսքով, հարկային ստուգումներ պետք է իրականացվեն բացառապես ռիսկային օբյեկտներում, իսկ ՓՄՁ ոլորտում` միայն ծայրահեղ դեպքերում:
Բացի այդ, նա հանձնարարեց Պետական եկամուտների կոմիտեին բացառել հարկային համակարգի աշխատակիցների կողմից հնարավոր սուբյեկտիվ մոտեցումները և ապահովել նրանց գործունեության թափանցիկությունը:
«Բոլոր գործողությունները պետք է իրականացվեն` առանց բիզնեսին լրացուցիչ անախորժություններ պարգևելու. ոչ մի ձևակերպում կամ ստուգում չպետք է խոչընդոտի նրանց կայուն գործունեությանը», - ասաց Կարապետյանը: Վարչապետը ավելացրեց, որ Կոմիտեին նոր հանձնարարականներ չի տալիս. դրանք ուղղակի նրանց պարտականություններն են, որոնք նրանք պետք է կատարեն: -0-
