Դա ճակատագրական, ռազմավարական նշանակության որոշում է․ Փաշինյանը՝ ատոմակայանի մասին
Այսօր,
19:09
Մենք նոր ատոմային ռեակտոր, միջուկային ռեակտոր ունենալու հարցը քննարկում ենք Ռուսաստանի, Միացյալ Նահանգների, Ֆրանսիայի, Չինաստանի և Հարավային Կորեայի հետ, հայտարարել է Փաշինյանր
ԵՐԵՎԱՆ, 11 փետրվարի․/ԱՌԿԱ/․ Մենք նոր ատոմային ռեակտոր, միջուկային ռեակտոր ունենալու հարցը քննարկում ենք Ռուսաստանի, Միացյալ Նահանգների, Ֆրանսիայի, Չինաստանի և Հարավային Կորեայի հետ։
Այս մասին այսօր ԱԺ-Կառավարություն հարցուպատասխանի ժամանակ հայտնել է ՀՀ վարչապետ Նիկոլ Փաշինյանն՝ ընդգծելով, որ դա ճակատագրական և ռազմավարական նշանակության որոշում է։
«Որոշում կայացնելիս մենք պետք է համոզված լինենք, թե որ առաջարկն է մաքսիմալ համապատասխանում ՀՀ- ի շահերին», նշեց վարչապետը։
Ըստ Փաշինյանի՝ անհրաժեշտ է ճիշտ ուսումնասիրել միջուկային էներգետիկայի շուկան։
«Կան գնահատականներ, որ միջուկային վառելիքի՝ այս պահին հայտնի պաշարները բավարար են միայն 70 տարվա համար», ասաց վարչապետը։
Փաշինյանը շեշտեց, որ ատոմակայանի կառուցումը պահանջում է հստակ ֆինանսական սխեմա, որպեսզի ներդրված միջոցները վերադարձվեն։
Վարչապետը հայտնեց նաև, որ Հայաստանն այժմ գտնվում է Մեծամորի ատոմակայանի գործունեության ժամկետը մինչև 2036 թվականը երկարացնելու ցիկլի մեջ, որից հետո ենթադրվում է ևս մեկ փուլ, որով հնարավոր կլինի ատոմակայանի աշխատանքը երկարաձգել ևս 10 տարով՝ հասցնելով այն մինչև 2046 թվականի։
