Ֆրանսիական ընկերությունները կարող են սկսել ծրագրի իրականացումը Սյունիքում․ ԱԳՆ
ԵՐԵՎԱՆ, 2 մայիսի․/ԱՌԿԱ/․ ՀՀ փոխարտգործնախարար Վահան Կոստանյանը վստահություն է հայտնել, որ Հայաստանի և Ֆրանսիայի կառավարությունների միջև ձեռք բերված պայմանավորվածությունների համաձայն՝ մոտ ապագայում ՀՀ Սյունիքի մարզում ֆրանսիական ընկերությունները կսկսեն գործել։
«Մասնավորապես՝ ռազմավարական նշանակության նախագծի իրականացման գործում», - ասաց նա երկուշաբթի Գորիսում կայացած Հայաստան-Ֆրանսիա ապակենտրոնացված համագործակցության 5-րդ համաժողովի բացման ժամանակ։
Կոստանյանը նշեց, որ երկու երկրների միջև պատմականորեն ձևավորված հարաբերությունները գտնվում են աննախադեպ բարձր մակարդակի վրա և ուղղված են տարածաշրջանային մարտահրավերները հաղթահարելու գործում Հայաստանին աջակցելուն։
Նրա խոսքով՝ համագործակցությունը մշտապես ընդլայնվում է բոլոր ոլորտներում, մասնավորապես՝ ռազմավարական ոլորտներում, որտեղ երկու երկրների միջև կապերը օրեցօր ամրապնդվում են։
«Համաժողովը Սյունիքում անցկացնելը խաղաղության և համագործակցության հստակ ուղերձ է, կայուն խաղաղության գրավականը նաև տնտեսական փոխկապակցվածությունն ու տարածաշրջանային համագործակցությունն է, որը կնպաստի տարածաշրջանում փոխադարձ վստահության մթնոլորտի հաստատմանը», - ասաց Կոստանյանը։
Փոխնախարարը նշեց, որ Սյունիքը կարող է դառնալ համագործակցության ռազմավարական կենտրոն, որտեղ ենթակառուցվածքների, տրանսպորտի և էներգետիկայի ոլորտներում համատեղ ծրագրերի իրականացումը կծառայի ոչ միայն Հայաստանի, այլև ամբողջ տարածաշրջանի շահերին։
«Մեր նպատակն է ձևավորել խաղաղ և անվտանգ տարածաշրջան, որտեղ հակամարտությունների փոխարեն կգերակշռի համագործակցությունը, փակ սահմանների փոխարեն՝ դարպասները, սպառնալիքների փոխարեն՝ միջպետական հարաբերությունները կզարգանան փոխադարձ հարգանքի հիման վրա», - ընդգծեց Կոստանյանը։
