«Գազպրոմ Արմենիա»–ն գազի գործող սակագնի վերանայման հայտ է ներկայացրել ՀԾԿՀ–ին
ԵՐԵՎԱՆ, 29 ապրիլի. /ԱՌԿԱ/. «Գազպրոմ Արմենիա» ընկերությունը Հանրային ծառայությունները կարգավորող հանձնաժողովին ներքին սպառողի համար գազի գործող սակագնի վերանայման հայտ է ներկայացրել, հայտնում է ՀԾԿՀ մամուլի քարտուղար Մարիամ Ստեփանյանը։
Նա նշեց, որ հայտի համաձայն, նախատեսվում է նվազեցնել սակագինը ամսական մինչև 10 հազար խմ գազ օգտագործող բաժանորդների համար 156 դրամից մինչև 146.7 դրամ 1 խմ գազի դիմաց (6%–ի կրճատում)։
Ակնկալվում է նաև սակագնի վերանայում ամսական 10 հազար խմ գազից ավելի օգտագործող խոշոր սպառողների համար։
Ապրիլի սկզբին Ռուսաստանը նվազեցրել է Հայաստանին մատակարարվող բնական գազի գինը սահմանում 165 դոլարից մինչև 150 դոլար հազար խմ գազի դիմաց։
Ներկայում Ռուսաստանը Վրաստանի տարածքով Հայաստան մտնող գազի հիմնական մատակարարն է։ --0--
