Հայաստանի փոքր համայնքների ջրային ծրագրի շրջանակներում Եվրոպական ներդրումային բանկը 6,5 մլն եվրոյի չափով վարկ է հատկացրել

ԵՐԵՎԱՆ, 7 օգոստոսի. /ԱՌԿԱ/. Եվրոպական ներդրումային բանկը (European Investment Bank - EIB) և ՀՀ ֆինանսների նախարարությունը համաձայնագիր են ստորագրել, համաձայն որի Բանկի կողմից 6,5 մլն եվրոյի չափով վարկ կհատկացվի Հայաստանի փոքր համայնքների ջրային ծրագրի իրականացման համար։

«Ծրագրի նպատակն է բարելավել ՀՀ Տավուշի, Լոռիի, Շիրակի, Գեղարքունիքի, Կոտայքի, Սյունիքի, Վայոց Ձորի մարզերում 17 բնակավայր սպասարկող` «Հայջրմուղկոյուղի» ՓԲԸ կողմից շահագործվող ջրամատակարարման, ջրահեռացման (կոյուղու) և ջրի մաքրման օբյեկտների վերակառուցումն ու արդիականացումը: Մասնավորապես` նախատեսվում է բարձրացնել 300.000 սպառողներին մատուցվող ծառայությունների որակը»,–ասաց Հայաստանի ջրային տնտեսության պետական կոմիտեի նախագահ Անդրանիկ Անդրեասյանը։

Ըստ նրա, մասնավորապես նախատեսվում է զգալիորեն բարձրացնել խմելու ջրի մատակարարման տևողությունը, որը ներկայում կազմում է միջինում ավելի քիչ, քան 14 ժամ, ինչպես նաև ապահովել ջրի որակի լիարժեք համապատասխանությունը միջազգային ստանդարտներին:

Ֆինանսների նախարար Վաչե Գաբրիելյանն իր հերթին լրագրողներին տեղեկացրեց, որ ծրագրի իրականացման համար ընդամենը 21,7 մլն եվրոյի չափով միջոցներ են հատկացվել, որից 6,5 մլն եվրոն Վերակառուցման և Զարգացման եվրոպական բանկն է հատկացրել, Եվրամիությունը 7,6 մլն եվրո դրամաշնորհ է տրամադրել, իսկ 1,1 մլն եվրոն դոնորենրի ֆինանսական աջակցությունն է կազմել։ 
«Ծրագիրը նախատեսված է ավարտել 2015թ.–ին։ Վարկի մարման ժամկետը կազմում է 4–25 տարի` երկու ամսից մինչև 7 տարի արտոնյալ ժամանակահատվածով, իսկ լողացող դրույքը հավասար կլինի EUROLIBOR +ֆիքսված մարժա»,– ավելացրեց նա։ –0–