Հայաստանն ապաքրեականացնում է մաքսանենգության մասին հոդվածը
ԵՐԵՎԱՆ, 12 մայիսի. /ԱՌԿԱ/. ՀՀ Ազգային ժողովը հինգշաբթի արտահերթ նիստում առաջին ընթերցմամբ ընդունեց «Հարկերի մասին» օրենքում և ուղեկցող օրենքներում փոփոխությունները և լրացումները, որոնք նախատեսում են մաքսանենգության հոդվածի ապաքրեականացում:
Ինչպես հայտարարել է Հայաստանի պետական եկամուտների կոմիտեի փոխնախագահ Վախթանգ Միրումյանը, փոփոխություննրը պայմանավորված են Հայաստանի անդամակցությամբ ԵՏՄ-ին և օրենսդրության ներդաշնակեցման պարտավորություններով, այդ թվում նաև` քրեական և վարչական պարտավորությունների գծով:
Միրումյանի խոսքով, օրենքում հիմնական փոփոխություններից մեկը մաքսանենգության ապաքրեականացնումն է, ինչը նշանակում է, որ օրենսդրական փաթեթի ընդունումից հետո տնտեսվարող սուբյեկտները քրեական պատասխանատվություն չեն կրելու` մաքսային նորմերը խախտելով ապրանքատեսակներ ներկրելու համար:
Նա նշեց, որ տնտեսվարող սուբյեկտները չեն ենթարկվելու մաքսանենգության համար քրեական պատասխանատվության: Դրա փոխարեն նրանց առաջարկվելու է հաշվարկել չհաշվառված հարկերը, տուրքերը, տուգանքները, և պետությանը հասցված վնասը փոխհատուցելու դեպքում հարցը կփակվի: Հակառակ դեպքում, կկիրառվի Քրեական օրենսդրության հարկերից չարամտորեն խուսափելու հոդվածը:
«Փաստացիորեն, եթե նախկինում մաքսային փասթաթղթերի սխալ կամ անժամանակ ձևակերպման համար տնտեսվարող սուբյեկտները ենթարկվում էին քրեական պատասխանատվության մաքսանենգության համար, ապա այժմ նրանց հնարավորություն է տրվում սահմանափակվել տուգանքով և չազատազրկվել մաքսանենգության համար», - ասաց Միրումյանը:
Ընդ որում, նա նշեց, որ ապաքրեականացումը չի վերաբերելու արգելված ապրանքատեսակների ներկրմանը, ինչպիսիք են` թմրանյութերը, զենք ու զինամթերքը, կանխիկ գումարը:
Միաժամանակ, կապաքրեականացվի նաև կալանքի տակ գտնվող մինչև 500 հազար դրամ արժողությամբ սեփականության անօրինական օգտագործումը:
«Այսօրվա դրությամբ նման սեփականության օգտագործումը հանգեցնում է քրեական պատասխանատվության, իսկ փոփոխություններով առաջարկվում է սահանափակվել նվազագույն աշխատավարձի հարյուրապատիկ չափով գումարի տուգանքով», - ասաց Միրումյանը:
Փաստացիորեն, ինչպես նշեց ՊԵԿ նախագահի տեղակալը, առաջարկվում է մեղմել պատասխանատվությունը առաջին փուլում, եթե խախտումները մեծ չեն կամ ոչ դիտավորյալ բնույթ են կրում: -0-
