ՀՀ-ում շինարարության ծավալը 2026 թ․-ին 3 ամսում աճել է 22%-ով՝ հասնելով 95,6 մլրդ դրամի

ԵՐԵՎԱՆ, 14 մայիսի․/ԱՌԿԱ/․ Հայաստանում շինարարական աշխատանքների ծավալը 2026 թ․-ի հունվար-մարտ ամիսներին ընթացիկ գներով կազմել է 95 640,1 մլն դրամ՝ 2025 թ․-ի հունվար-մարտի համեմատ աճելով 22%-ով։

Այս մասին հայտնում է ՀՀ Վիճակագրական կոմիտեն։

Ընդ որում, մարտ ամսին շինարարության ծավալը կազմել է 41 686,4 մլն դրամ, ինչը 24%-ով ավելի է, քան 2025 թ․-ի մարտին։

Այս տարվա 3 ամիսների ընթացքում շինարարության ամենամեծ ծավալը ֆինանսավորվել է կազմակերպությունների միջոցների հաշվին՝ 56 163,2 մլն դրամ կամ ընդհանուր ծավալի 58,7%-ը։ 2025 թ․-ի հունվար-մարտի համեմատ ցուցանիշն աճել է 33,9%-ով։

Բնակչության միջոցների հաշվին իրականացված շինարարության ծավալը կազմել է 28 507,8 մլն դրամ՝ ընդհանուր ծավալի 29,8%-ը՝ աճելով 23,8%-ով։ Պետական բյուջեի հաշվին ֆինանսավորվել է 7 752,1 մլն դրամի շինարարություն՝ ընդհանուր ծավալի 8,1%-ը, ինչը 30,8%-ով պակաս է նախորդ տարվա համեմատ։ Համայնքային միջոցների հաշվին աշխատանքների ծավալը հասել է 2 910,2 մլն դրամի՝ ընդհանուր ծավալի 3,1%-ը՝ աճելով 39,5%-ով, իսկ մարդասիրական օգնության միջոցների հաշվին՝ 306,8 մլն դրամ կամ 0,3%՝ 79,7% աճով։

Միաժամանակ, միջազգային վարկերի միջոցներով իրականացված շինարարության ծավալը հունվար-մարտին կազմել է 1 411,5 մլն դրամ կամ ընդհանուր ծավալի 1,5%-ը՝ նախորդ տարվա նույն ժամանակահատվածի համեմատ կրճատվելով 70,7%-ով։ Այս գումարից Ասիական զարգացման բանկին բաժին է ընկել 577,9 մլն դրամ, Վերակառուցման և զարգացման եվրոպական բանկին՝ 142,1 մլն դրամ, Գերմանական զարգացման բանկին՝ 91,7 մլն դրամ, Եվրոպական ներդրումային բանկին՝ 1,7 մլն դրամ, իսկ այլ կառույցներին՝ 598,1 մլն դրամ։

2026 թ․-ի հունվար-մարտին ամենաշատ շինարարական աշխատանքներն իրականացվել են անշարժ գույքի հետ կապված գործունեության ոլորտում՝ 56 736,1 մլն դրամ կամ ընդհանուր ծավալի 59,3%-ը։ Հաջորդում են էլեկտրականության, գազի, գոլորշու և լավորակ օդի մատակարարումը՝ 8 224,5 մլն դրամ կամ 8,6%, ինչպես նաև կրթությունը՝ 4 189,4 մլն դրամ կամ 4,4%։ (1 դոլարը - 368,63 դրամ)