Մեծամորի ատոմակայանի աշխատանքը 5 ամսով կանգնեցվել է․ նախարար

ԵՐԵՎԱՆ, 3 ապրիլ․/ԱՌԿԱ/․ Շահագործման ժամկետի երկարաձգման ծրագրով պայմանավորված՝ Մեծամորի ատոմակայանի աշխատանքը ապրիլի 1-ից 5 ամիս ժամկետով կանգնեցվել է։

Այս մասին հայտնել է ՏԿԵ նախարար Դավիթ Խուդաթյանը։

«Ամենայն հավանականությամբ, 2026 թվականին մեր արևային կայաններն արտադրած կլինեն այնքան էլեկտրաէներգիա, ինչքան արտադրած կլիներ Մեծամորի ատոմակայանը», - ասել է Խուդաթյանը կառավարության նիստի ժամանակ։

Նախարարը համոզմունք է հայտնել, որ այդ թվերը իրար համադրելի կլինեն։

Ավելի վաղ՝ մարտի 18-ին, ՀՀ կառավարությունը ՀԱԷԿ-ին հատկացրել է 63,2 միլիարդ դրամի բյուջետային վարկ՝ մինչև 2036 թվականը դրա շահագործման ժամկետը երկարաձգելու համար, որը կտևի մոտավորապես հինգ ամիս։ Այս ընթացքում ատոմակայանը կենթարկվի նաև խոշոր պլանային սպասարկման։

Հայկական ԱԷԿ–ի մասին

Հայկական ԱԷԿ-ը՝ Հարավային Կովկասի տարածաշրջանում միակ ատոմային էլեկտրակայանը, գտնվում է Մեծամոր քաղաքի մոտ՝ Երևանից մոտ 30 կմ դեպի արևմուտք։ Կայանը երկրի էլեկտրաէներգիայի հիմնական աղբյուրներից մեկն է՝ ապահովելով ընդհանուր արտադրության մինչև 40%-ը։

Գործող էներգաբլոկի շահագործման ժամկետը երկարաձգվել է մինչև 2026 թվականը, և աշխատանքներ են տարվում այն ևս 10 տարով երկարաձգելու ուղղությամբ։

Հայաստանի իշխանությունները ծրագրում են 8–10 տարվա ընթացքում կառուցել նոր ատոմակայան։ Ներկայումս ուսումնասիրվում են տարբեր տարբերակներ և ԱՄՆ-ի, Ֆրանսիայի, Չինաստանի, Ռուսաստանի ու Հարավային Կորեայի գործընկերների փորձը։

Ավելի վաղ «Ռոսատոմի» գլխավոր տնօրենի առաջին տեղակալ Կիրիլ Կոմարովը, պատասխանելով «ԱՌԿԱ» գործակալության հարցին, հայտարարել էր, որ կորպորացիան կարող է Հայաստանին առաջարկել 50-ից մինչև 1000 ՄՎտ հզորությամբ միջուկային ռեակտորներ։ Նրա խոսքով՝ կա հնարավորություն, մասնավորապես, 50 ՄՎտ հզորությամբ բլոկներից «հավաքել» ցանկացած հզորության ռեակտոր։