ԵԱՏՄ–ն ներգրավել է 24 մլրդ դոլար «Մեկ գոտի` մեկ ճանապարհ» նախագծի հաշվին. Պուտին

ԵՐԵՎԱՆ, 16 հոկտեմբերի./ԱՌԿԱ /. Եվրասիական տնտեսական միության (ԵԱՏՄ) երկրները «Մեկ գոտի` մեկ ճանապարհ» նախաձեռնության շրջանակում համատեղ աշխատանքի հաշվին արդեն ստացել են մոտ 24 միլիարդ դոլարի ներդրումներ։ Այս մասին ՌԴ նախագահ Վլադիմիր Պուտինը հայտարարել է Չինաստանի մեդիակորպորացիային տված հարցազրույցում, հաղորդում է ՏԱՍՍ-ը։

«Եվրասիական տնտեսական միության երկրները «Մեկ գոտի` մեկ ճանապարհ» նախաձեռնության շրջանակում համատեղ աշխատանքի ընթացքում արդեն ապահովել են 24 միլիարդ դոլարի ներդրում։ Սակայն այս ծավալն աճում է, քանի որ փոխշահավետ նախագծերի թիվն ավելանում է», - ասել է Ռուսաստանի ղեկավարը։

Ինչպես նշել է Պուտինը, այս որոշումները ձեռնտու են ոչ միայն այն երկրներին, որոնք նախաձեռնության շրջանակում որոշակի վարկեր են ստանում, «դրանք ձեռնտուն են նաև Չինաստանին, քանի որ Չինաստանը ևս այդ նախագծերի իրագործումից ստանում է պրոդուկտներ, պայմաններ ավելի լավ և մեծ զարգացման համար»։
«Այս ամենն արվում է փոխադարձ շահի հիման վրա», – ընդգծել է նա։

Ռուսաստանի ղեկավարն ուշադրությունը դարձրել է այն փաստին, որ յուրաքանչյուր երկիր երկկողմ կամ բազմակողմ ձևաչափերի շրջանակում ընտրում է այն, ինչ իրեն ձեռնտու է։ «Ոչ ոք ոչինչ չի պարտադրում։ Բայց դա խթանում է, զարգացման պայմաններ է ստեղծում»,- հայտարարել է նա։

Ըստ ՌԴ նախագահի, նույնը կարելի է ասել լոգիստիկ ենթակառուցվածքային օբյեկտների զարգացման մասին։
«Վերջերս Չինաստանի հետ Ամուր գետի վրայով երկու կամուրջ ենք կառուցել: Իմ կարծիքով, սա լավ է նաև մարդկանց համար. իրար հետ շփվող մարդկանց թիվն ավելանում է, սա լավ է նաև բիզնեսի, տնտեսության զարգացման համար, քանի որ թույլ է տալիս ավելացնել ապրանքաշրջանառությունը»,– ասել է նա։

Հավասարակշռված զարգացում

Հարցին, թե ինչ նշանակություն ունի «Մեկ գոտի` մեկ ճանապարհ» նախաձեռնության շրջանակում համագործակցությունն ամբողջ աշխարհի համար, Պուտինը հիշեցրել է ՄԱԿ-ի կողմից սահմանված կայուն զարգացման 17 նպատակները։ Նա նշել է, որ շրջակա միջավայրի համար պայքարը և կլիմայի փոփոխության դեմ պայքարը «շատ կարևոր ուղղություններ են, բայց ոչ միակը»։

«Մենք չպետք է մոռանանք այնպիսի նպատակի մասին, ինչպիսին է, օրինակ, աղքատության դեմ պայքարը: Ինչպե՞ս կարող ենք աֆրիկյան երկրների մարդկանց ասել` դուք չեք ստանա նավթ, նավթամթերք, պետք է հույսներդ դնեք բացառապես էներգիայի վերականգնող աղբյուրներին` քամու ուժին, օրինակ, արևին և այլն։ Դրանք մեծ մասամբ հասանելի չեն զարգացող տնտեսությունների համար։ Եվ ի՞նչ, մարդիկ պետք է տառապե՞ն սովից։ Ամեն ինչ պետք է հավասարակշռված լինի, բոլոր որոշումները պետք է հավասարակշռված լինեն», – վստահ է ՌԴ նախագահը։

Նախաձեռնության մասին

Հոկտեմբերի 17-ից 18-ը Չինաստանի մայրաքաղաքում կանցկացվի «Մեկ գոտի՝ մեկ ճանապարհ» երրորդ միջազգային ֆորումը։ Ռուսաստանի Դաշնության նախագահը նախատեսում է մասնակցել այդ ֆորումին։ Միաժամանակ, Կրեմլն ակնկալում է, որ Չինաստանի առաջնորդ Սի Ցզինպինի հետ «ժամանակ կգտնեն դեմ առ դեմ շփվելու համար»։

«Մեկ գոտի` մեկ ճանապարհ» նախաձեռնությունը 2013 թվականին Սի Ցզինպինի կողմից առաջարկված հայեցակարգ է՝ միջազգային բազմակողմ առևտրաներդրումային նախագծերի ակտիվացման համար` շահագրգիռ երկրների մասնակցությամբ և չինական, ինչպես նաև արտասահմանյան կապիտալի օգտագործմամբ։ Հայեցակարգին արդեն միացել է ավելի քան 150 պետություն և 30 միջազգային կազմակերպություն։–0–