Հայաստանի համար ԵԱՏՄ-ի և ԵՄ-ի միջև դիլեմա չկա, հանրապետության անդամակցությունը ԵՄ-ին անհնար է․ Իսկանդարյան
ԵՐԵՎԱՆ, 1 հուլիսի․/ԱՌԿԱ/․ Հայաստանի համար ԵԱՏՄ-ի և ԵՄ-ի միջև դիլեմա չկա։ Հանրապետության անդամակցությունը ԵՄ-ին անհնար է, կարծում է Կովկասի ինստիտուտի տնօրեն Ալեքսանդր Իսկանդարյանը։
«Իհարկե, անհնար է միաժամանակ լինել ԵԱՏՄ-ում և ԵՄ-ում, քանի որ երկուսն էլ մաքսային միություններ են։ Եթե երկիրը միաժամանակ լինի երկու ապրանքային միություններում, պատկերացնում եմ, թե ինչ մղձավանջ կսկսվի տնտեսության, առևտրի, արտահանման մեջ։ Բայց ԵՄ–ին անդամակցելու որևէ հեռանկար չկա Հայաստանի համար», - ասել է Իսկանդարյանը ՌԲԿ-ին տված հարցազրույցում։
Քաղաքագետն անդրադարձել է այս գարնանը Հայաստանում ընդունված «ՀՀ-ի Եվրոպական Միությանը անդամակցության գործընթացի մեկնարկի մասին» օրենքին։
«Եկեք լուրջ խոսենք, ոչ մի ներքին օրենք սկզբունքորեն չի կարող ազդել երկրների ԵՄ անդամակցության վրա։ Կան Անդամակցության կոպենհագենյան չափանիշներ, որոնց պետք է համապատասխանել անդամակցության բանակցությունները սկսելու համար: Այս օրենքըներքին քաղաքականության գործոն է, այլ ոչ թե արտաքին քաղաքականության», – ասել է Իսկանդարյանը՝ նշելով, որ հայկական հասարակության մեջ ԵՄ-ին անդամակցելու մեծ պահանջարկ կա։
«Մարդիկ ընդհանրապես ապրում են միֆերով։ Ներկա միֆն այն է, որ Արևմուտքը կօգնի մեզ։ Եվ Հայաստանի ղեկավարությունը, անկասկած, աջակցում է այս միֆին, քանի որ նրան անհրաժեշտ է վերընտրվել։ Եթե կա թեզ, որին աջակցում է բնակչության մեծամասնությունը, ապա ինչո՞ւ չօգտագործել այն», - ասել է քաղաքագետը։
«Ես բավականին հաճախ եմ այցելում Եվրոպա և այնտեղ զրուցում տարբեր գործիչների հետ, այդ թվում՝ քաղաքական։ Նրանք քառակուսի աչքերով հարցնում են ինձ. «Ինչո՞ւ եք սա արել» (ընդունել օրենքը)։ Եվ ես ստիպված եմ լինում նրանց մանրամասն բացատրել այն, ինչ ձեզ եմ բացատրում։ Նման հեռանկար չկա, ընդհանրապես», - ասել է Իսկանդարյանը։
Ինչ վերաբերում է Մոսկվայի արձագանքին, Իսկանդարյանը վստահություն է հայտնել է, որ նրանք ամեն ինչ հիանալի հասկանում են։
«Հավանաբար կա գրգռվածություն։ Բայց եթե բարձրանանք լուրջ մակարդակի վրա՝ մարդիկ, ովքեր որոշումներ են կայացնում, ապա իսկապե՞ս կարծում եք, որ Կրեմլի վերլուծաբանները չեն կարդացել կոպենհագենյան չափանիշները։ Եվրոպայում դրանք հաճախ անտեսվում էին՝ ընդունելով որոշ պետությունների, բայց դա Բրյուսելի հստակ քաղաքական շահն էր, նա դա անում էր իր, ոչ թե այլ երկրների համար։ Հայաստանի հետ կապված նման շահ չկա։ Բայց սա որոշակի նարատիվ է, որը գործում է Հայաստանի ներքին քաղաքականության մեջ», - վստահ է Իսկանդարյանը։
Ռուսաստանի դիրքորոշման մասին
Պաշտոնական Մոսկվան տարբեր մակարդակներով բազմիցս հայտարարել է, որ Հայաստանի միաժամանակյա մասնակցությունը ԵՄ-ին և ԵԱՏՄ-ին անհնար է։
Մասնավորապես, վերջերս Ռուսաստանի փոխվարչապետ Ալեքսեյ Օվերչուկը հայտարարել է, որ նախատեսում է ստորագրել ՀՀ փոխվարչապետ Մհեր Գրիգորյանին ուղղված նամակ, որում նշվում է, որ ՀՀ-ի կողմից ԵՄ-ին անդամակցելու ուղղությամբ ձեռնարկված գործողությունները հակասում են Եվրասիական տնտեսական միության նորմերին։ Նա նշել է, որ Ռուսաստանը հետևում է ԵՄ-ի հետ Հայաստանի մերձեցման շրջանակում տեղի ունեցող գործընթացներին։
