Ահարոնյան. ոստիկանության պետի հանձնարարությամբ նշանակվել են ծառայողական քննություններ

ԵՐԵՎԱՆ, 19 հուլիսի. /ԱՌԿԱ/. ՀՀ ոստիկանությունը ստուգում է Երևանում ձերբակալությունների ժամանակ բռնության դեպքերկ մասին տեղեկությունների հավաստիությունը, Facebook սոցցանցի իր էջում գրել է ՀՀ ոստիկանության տեղեկատվության և հասարակայնության հետ կապերի վարչության պետ Աշոտ Ահարոնյանը։

ԶԼՄ–ների հաղորդմամբ` ավելի քան երկու հարյուր մարդ բերման է ենթարկվել ոստիկանական բաժանմունքներ մի խումբ զինված անձանց կողմից ՊՊԾ գնդի շենքի զավթումից հետո։ Իրավապահները ստուգում էին բերման ենթարկվածներին և զինված խմբավորման միջև կապը։

«Ոստիկանության պետի հանձնարարությամբ մեզ փոքրիշատե հայտնի բոլոր դեպքերով նշանակվել են ծառայողական քննություններ: Եթե իսկապես ցանկանում եք պարզվի իրականությունը և հնարավոր մեղավորները պատժվեն, աջակցեք քննությանը՝ դիմեք ոստիկանություն: Դժվարություն ծագելու դեպքում զանգահարեք ինձ կամ տեղեկություն տվեք սոցցանցերով», – գրել է Ահարոնյանը։

Նրա խոսքով` սա է իրողությունների ճշմարիտ պատկերը ստանալու ճանապարհը։

«Հակառակ դեպքում, կրկնում եմ, ստիպված կլինենք կարծել, որ այս ամենը պրիմիտիվ ու ինֆանտիլ փորձեր են՝ ոստիկանությունը թիրախավորված անվանարկելու և հանրությանը թյուրիմացության մեջ գցելու նպատակով», – գրել է Ահարոնյանը։

Նա նաև նշել է, որ լրահոսում որոշ ՀԿ-ների ներկայացուցիչներ տեղեկատվություն են տարածել, թե ոստիկանություն բերվածներին ծեծել են, նվաստացրել։

«Եվ այս ամենը՝ առանց որևէ կոնկրետ փաստ, տվյալ, հասցե նշելու, անորոշ ակնարկներով, ինչ-որ տեսանյութերով, որոնց տեքստը չի լսվում նույնիսկ ամենամեծ ցանկության դեպքում: Այս <մոտավորւթյունը> զարմանալի է հատկապես այն առումով, որ հիշյալները նախկինում միշտ հականե-հանվանե են անդրադարձել իրենց պաշտպանյալներին: Այսօր այդպես չէ, և դա հիմք է տալիս ենթադրելու, որ իրողությունները շահարկվում են», – գրել է Ահարոնյանը։

Նա կոչ է արել ձեռնպահ մնալ նման «սիրողական» ու փակուղային գործելակերպից:

Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։

ՊՊԾ գնդի շենքը զավթած անձինք պահանջում են ազատել «Հիմնադիր խորհրդարան» արմատական ընդդիմադիր շարժման առաջնորդ Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։ -0-